ATUALITÂT. Da lis sinis a lis ruedis

Ai 7 di Març che al ven la ferade Cjasarse-Pinçan e tornarà a vivi, dopo plui di doi decenis che e jere bandonade. “Aruotalibera”, associazion di Pordenon leade ae Fiab (Federazion taliane amîs de biciclete) e à programât par chê date une stafete ciclistiche che e colegarà i doi cjâflinie de ex ferade par sensibilizâ la opinion publiche sul recupar de trate tant che piste ciclabile. Un progjet che i sta lavorant parsore la Provincie di Pordenon, adun cui comuns traviersâts de linie (Cjasarse, Voleson, Sant Martin, Sant Zorç, Spilimberc e Pinçan) e che par chest i deputâts di Pordenon a Rome a àn za interessât il Guvier talian, che si sta movint cu lis Feroviis dal Stât par facilitâ la vendite de trate.
“Ai 7 di Març – al à dit Attilio Pellarini di Aruotalibera – noaltris o fasarìn la nestre part, supuartâts dal Comitât pro ciclabile su la vecje ferade Cjasarse-Pinçan, par favorî la trasformazion in ciclabile. Une destinazion di ûs che e varès efiets ambientâi benefics e turistics”. La pedalade dai 7 di Març si inserìs te tierce edizion de Zornade taliane des Feroviis dismenteadis. Il coordenament Fiab F-VJ (gjestît di Alberto Deana tra lis associazions Fiab Aruotalibera di Pordenon, Fiab Ulisse di Triest e Fiab Amici del Pedale di Codroip cu la Sezion socis di Udin) al à decidût che a la manifestazion dai 7 di Març a parteciparan ancje lôr. No dome Friûl però, stant che a saran in siele ancje cicloamadôrs dal Venit: al è di fat l’impegn ancje di Fian Libera la bici di Conean e de Fiab Adb di Mestre, che a vignaressin a Cjasarse puartant li sbicicletis sui trens de linie Vignesie-Udin. Une zornade di inizi di Primavere che e à voie di stiçâ la atenzions suntune ferade dismenteade e lassade bandonade par masse timp.
(Redazion)