ATUALITÂT – Comedie continue

Al mancje simpri un tocut. Un tocut che al fas saltâ il puzzle. Come se il cuadri complet de presince de marilenghe tai mieçs di informazions e di comunicazion al fos segnât di une sorte di maledizion cence fin. Tu puedis cirîlu dulà che tu vuelis, ma zire e volte, chel tocut, nol salte fûr. E no si rive mai ae fin de opare.
A PENSÂ MÂL…_ Al dîs, il senatôr Andreotti, che a pensâ mâl si fâs pecjât, ma ciertis voltis si le imbrucje juste. E cussì, o podìn ben dî che le vevin pensade juste za chê volte che i nestris sorestants a àn inmaneât i “Stâts gjenerai des lenghis minoritariis” de Regjon. Fevelâ, fevelâ, fevelâ. Ancjemò fevelâ, par pierdi, scjafoiâ, tal mieç di tantis peraulis, lis conclusions che ducj za a cognossevin e che a vevin domandât, ancjemò prime che e scomençàs la cunvigne. Vâl a dî che, pe atuazion des misuris di tutele de marilenghe – propit come che la leç statâl e comandarès –, al  bastarès inviâ i decrets atuatîfs de leç regjonâl 29 dal 2007, e dai une cuvierte finanziarie adeguade. Chest al è propit il pont danât, il gnerf scuviert, la fonde di dut: cuvierte finanziarie. Bêçs. Che evidentementri no si vuelin cjatâ. E par gjavâ di mieç il probleme, si tire dilunc ancje la aprovazion dai regolaments.
Palanchis, ancje daûr dal Contrat di Servizi Ministeri dal Disvilup economic – Rai. Dentri dal document, il riferiment ae lenghe e culture furlane al passe in Comission di Vigjilance (ancje dopo un pressing partît dal Friûl, cun tant di spedizion) ma une volte rivât in Viâl Mazzini, al torne misteriosementri a sparî. Se i fos stât dât bon acet, la Rai e varès dovût jessi obleade a inviâ programs in marilenghe, in vie continuative e no plui sperimentâl, tant che si fâs par Sloven, Todesc e Ladin. Dut produsût in maniere direte de concessionarie dal servizi public. Ancje in chest câs, il Cda tal segret de sô sentade al à di vê fats cuatri conts. E la cuvierte dai massepassûts “Ballando con le stelle” o “Isola dei famosi” no si pues in cualchi mût scurtâ, a pro di altri. Le varan pensade cu lis peraulis de famose vigjilesse dal spot Rai: “Vâstu fûr cu la cassele?”.
SOLUZION, PAR MÛT DI DÎ…_ Francs, come chei che il muscolâr assessôr ae culture Elio De Anna al voleve spostâ di une bande a di chê altre. Il caric di novante, il folp De Anna lu mole intune interviste al Gazetin. Pal furlan in Rai, i bêçs a rivaran. Dusinte mil euros dal Stât. Come se al fos un pac di “Affari tuoi”. Dome che, al sclarìs De Anna, “chescj bêçs a saran part di chê cuote che il Stât al trasferìs ae regjon pe atuazion de leç 482”. La idee e je chê di dividi la torte (za di par se puare) che e rive di Rome, in plui che par comuns e ents publics, ancje a pro de Tv publiche. La rispueste je mande, a stret zîr, il “Comitât 482” e il “Comitât pal rilanç e la autonomie dal Friûl”: jù lis mans! Chei bêçs a coventin pai progjets tes scuelis, pai sporteliscj, pai cartei e pe comunicazion istituzionâl. Par fâ un confront, al sarès come se un sindic al gjavàs i bêçs stanziâts pal funzionament de scuele dal so teritori e, in belanç, ju dopràs par regolâ une strade. Pe Rai, i  finanziaments a àn di sei sigurâts cui fonts dal Stât e de Rai stesse, e no cui fonts de 482, ni de Regjon. Insome, vonde paiâ la Rai par che e fasi ce che e varès za di fâ in aplicazion de leç pe tutele des minorancis in Italie. In chest, o vin za dât o regalât in abondance. La segretarie provinciâl dal Pd di Udin, di prionte, e dîs: “Si va indenant cu la ande sperimentâl dai ultins agns e ae Rai i fâs comut, viodudis lis convenzions dal sigûr no “a pierdi”, paiadis cun chei bêçs”.
VARIAZION, SARAIE LA VOLTE BUINE?_ Beçs, apont, bêçs. Che al moment no ju viodin lis emitents radiotelevisivis privadis. Par onôr di cronache, De Anna al à rimandât aes variazions di belanç ma il predecessôr Roberto Molinaro al veve fat compagn, cence sucès. Lis piçulis emitentis al moment a son lis unichis che a van indenant a trasmeti, cence tancj befei. Chei cuatri carantans che a gjoldevin fintremai l’an passat, jur ai àn cancelâts bot e sclop, cence nancje tancj scrupui. Ça va sans dire.
Pardabon, al mancje simpri alc, un tocut, un tasselut piçul, par completâ il puzzle. In cheste danazion cence fin, viodarìno mai il cuadri complet?
Oscar Puntel