ATUALITÂT. Cjargnei in difese dal propri teritori

«La Cjargne e à dôs ricjecis: la aghe e l’ambient. Ducj i doi a son un dirit, no un ben di consum. Cuâl isal il program politic par un doman,  par cui che al vîf achì?». Cun chestis e altris peraulis, il comitât «Carnia in movimento» al à clamât la int al incuintri di sabide ai 13 di Març, inte sale de Comunitât Montane di Tumieç.
Si à cjacarât dal stât atuâl dal progjet dal eletrodot aerei Wurmlach-Somplât, argoment che il comitât al è daûr a tratâ di agns, come che si à podût viodi intal filmât di trê minûts proietât in cheste ocasion (si lu cjate su Youtube). A dâ man fuarte a cheste ‘imprese’ dai cjargnei, a son stadis lis testemoneancis di Hannes Guggenberg (Pro Gailtal Carinzie) che al à volût inmò une volte esprimi la contrarietât dai austriacs al progjet Pittini-Fantoni, e chê di Aldevis Tibaldi (Friûl Rurâl) che di pôc al è rivât a otignî l’intierament dal eletrodot Udin Ovest-Okroglo. Marco Lepre (Legambiente) si è fermât sui dâts tecnics dal progjet, tant che la altece dai pilons (fin a 65 metris) e la lôr colocazion inte za strente Val de Bût. Nol è mancjât l’intervent politic di Enore Picco (conseîr regjonâl de Lega Nord) che la dì prin, dutune cul so grup, al à presentât in Regjon une mozion pal intierament de linie.
Ancje il teme de aghe al à otignût un grum di interès di bande des passe 300 personis presintis in sale. Franceschino Barazzutti (Moviment Mont) al à fevelât de aghe di turbine (probleme dai lâts di Cjavaç e di Verzegnis), de aghe in butilie (Liariis, li che  e je deventade «Paradiso») e de aghe dal rubinet (privatizazion di Carniacque). Cheste ultime part e je stade ampliade dal sindic di Çurçuvint, un dai cuatri che – sfrutant la leç 152, art. 148, che al dîs che i comuns montans cun mancul di mil abitants a puedin gjestî la aghe di bessôi – no àn acetât di dâ in gjestion l’acuedot a Carniacque. «Al vûl un impegn di bande di ducj par un cambiament di direzion, di tindince, pal ben comun des personis – al à dit pre Pierluigi Di Piazza, dal Centri Balducci -. Come i Indios, che a fevelin cu la nature, cu la aghe, cu lis plantis, e che a àn rispiet di dut ce che a àn ator ator di lôr.»
Marta Vezzi