ATUALITÂT – Circul furlan a Triest

A vivin e a lavorin a Triest. A son professioniscj, pensionâts e frutats, rivâts jù par studiâ ae universitât. In comun a àn la lidrîs comune furlane e la voie di stâ in compagnie, magari dome par fâ une tabaiade in marilenghe une volte pe setemane. Un gust naturâl pe condivision de culture dal Friûl che e je deventade alc di plui, puartant ae nassite dal Circul furlan di Triest. Il sproc?
“Dulà che si nas ogni jerbe e pas”. Lenghe e tradizions, ma ancje volontariât, spirt di convivence e volontât di metisi in relazion cun chês altris realtâts dal teritori. «Vuê a Triest si stime che a vivin plui o mancul 20 mîl furlans – e spieghe la presidente dal gnûf sodalizi, Manuela Nodale – il Circul al vûl fâ propuestis culturâls furlanis che a valorizin la nestre identitât, ma ancje presentâsi a la comunitât di Triest par colaborâ cun chês altris associazions che a operin sul puest».
Il prin obietîf cumò al è chel di cjatâ une “cjase” dulà implantâ la gnove associazion, che in dì di vuê si è dade dongje ator dai taulins de ostarie “Da Mara” in vie Colonna 5, tal centri de citât, dulà che ogni martars di sere polente e frico a detin leç.
Il program presentât in ocasion de costituzion dal Circul al previôt la conservazion e la difusion de lenghe e de culture furlane, e spieghe ancjemò la Nodale, «cun ativitâts diviersis come, par esempli, il teatri, la musiche o lis mostris. O stin ancje pensant a spazis dulà presentâsi e fassi cognossi come in ocasion de manifestazion velistiche Barcolana».
“Tal zîr di un mês de nassite dal circul – e note Nodale – che nol è un Fogolâr, o vin tirât sù plui di 130 adesions, massime part jenfri int zovine. O vin lavorât tant par pandi la novitât ma distès il risultât nus à maraveât”. A caraterizâ il grup, secont Nodale, e je propite la eterogjeneitât dai siei aderents. «Nissune nostalgjie pal passât, pluitost desideri di vivi il jessi furlan cun semplicitât».
Dongje Manuela Nodale a son il president onorari, Franco Braida, il Comitât diretîf – Francesco Franzil, Riccardo Tonero, Mauro Dellago, Mara Pizzamiglio e Clara Dorigo – e i Revisôrs dai Conts – Michele Lanari, Renzo Snider e Marco Petris.
Redazion