ATUALITÂT – Canadà – Friûl: tante voie di riconession

Tra i zovins furlans dal Canadà, dai Stâts Unîts e in Patrie al è fuart il desideri di sentâsi di gnûf ducj tor di un grant fogolâr dulà che la tradizion si spose cu lis tecnologjiis.
A Toronto dai 21 ai 23 di Otubar si è davuelt il prin radun dai zovins furlans dal Nord Americhe, organizât cun “Ente Friuli nel Mondo” in “cabine di regjie” adun cun chês altris associazions de diaspore e la Regjon Autonome Friûl-Vignesie Julie. Une biele oportunitât di incuintri tra i 100 zovins delegâts e lis realtâts istituzionâls, economichis e culturâls dal Friûl, par rinfuarçâ, zontâ, e rinfrescjâ il leam tra i “nevôts de diaspore” e la “lontane”…. Patrie. Cemût che al jere za sucedût a Melbourne tal 2009, a Porto Alegre tal 2007 e al radun di “Ente Friuli nel Mondo” a Maian tal Avost 2010, tant e je sintude la conesion cul Friul, che nol fevele – o lu fâs pôc e mâl – cui gnûfs mieçs di comunicazions, ancje se la voie dai zovine e je tante, ancje di fâlu imparant la lenghe furlane, come che nus conferme ancje Marco Macorigh, che al veve il compit di coordenâ l’incuintri su culture e identitât «Imparâ il furlan e je la prime robe che nus àn domandât i zovins furlans a Toronto» nus conte Macorigh. Urgjent cumò al è lavorâ ducj, in Friûl e no dome, par riconeti i leams stracs: lu à capît ancje la Regjon che come che a contavin i resoconts uficiâi rivâts di Toronto, si è impegnade a “Tradusi lis necessitâts dai zovins presints in fats concrets tal mancul timp pussibil”.
Daniele Martina