ATUALITÂT – Belanç a lûs e ombris

Cuant che une robe e finìs par solit si va a tirâ lis conclusions e a fâ une sorte di belanç di ce che al è stât. Cussì al sucêt cul an che al finìs e si zire il lunari, e ancje cuant che une aministrazion e siere la sô part di lavôr. Cheste volte a fasi meti sot judizi al tocje ae ARLeF, stant che e siere un periodi aministratîf e che in curt al jentrarà a lavorâ un gnûf Consei di Aministrazion. Daspò agns di spiete, biadelore e je stade metude in pîts une agjenzie regjonâl pe lenghe furlane, cuntun consei di aministrazion e un indreçament rivât de politiche regjonâl in fuarce in chel moment, o ben il centriçampe.
Cumò, cambiât il tamon che al puarte indenant la regjon, ancje la gjestion de ARLeF e passe sot des indicazions che a rivin dal centridrete, cuntune ativitât dute di fâ e di pensâ.
Ma cemût ise stade la gjestion di cheste prime “epoche”? Lis opinions in mert a son cetantis e ancje vivarosis, cussì o vin sintût cualchidun di chei che a lavorin in chest cjamp e che sul teritori a doprin la lenghe furlane.
Mauro Missana, diretôr di Radio Onde Furlane, al da un judizi positîf di cheste aministrazion. «Stant che prime nol jere nuie, cumò al è stât brâf il President a dâ une struture ae agjenzie, metint jù ancje cualchi “palet” par fâ ordin te distribuzion dai finanziaments. Il lavôr fat de agjenzie al è stât avonde suficient a pet dai timps a disposizion e de grande dificoltât di movisi inte burocrazie nostrane che e ferme lis voris impen di judâlis. Il coragjo tal puartâ indenant un bon lavôr lu àn dimostrât cu lis sieltis fatis, mostrant braure e capacitât; stesse capacitât che si viôt tai gnûfs, e che e fâs sperâ ben pal futûr, cussì come che al è stât pandût dal gnûf president Zanon intune interviste fate propit inte radio furlane.»
Un judizi suficient lu da Renzo Balzan, gjornalist e diretôr di “Ladins dal Friûl”, che nol è dal dut deludût di ce che al è stât fat. «Stant che la ARLeF e je stade inzessade di une scjaipule politiche, i risultâts no son stâts bruts, ancje considerant che in Friûl e je une soreposizion di struturis che e fâs pierdi risorsis, impen di costruî alc di impuartant. Chi di nô, lis competencis a son de ARLeF, de Provincie di Udin, de Filologjiche, dal Servizi regjonâl des identitâts linguistichis, e chest labirint nol jude a cressi: al sarès miôr vê une agjenzie uniche o un istitût sul stamp dai nestris cusins ladins.»
Plui sevêr il il pinsîr di Sandri di Suald, scritôr, publicitari, espert di comunicazion. Lui al dîs che la ARLeF e je «une barcje cence comandant, une nâf che no à nissun al tamon e che cumò e je daûr a infondâsi». Seont lui, la agjenzie «e je fate di oms cun grandis specializazions tal propri lavôr ma cence professionalitât e che duncje a àn lavorât di conseguence, butant vie tancj bêçs in tancj agns, cence vê une strategjie che e cjali lontan pal futûr de lenghe furlane. Si à spindût tant par finanziâ clapis e claputis cence costruî lavôr e svilup, justificant sot de peraule “culture” tantis iniziativis cence fonde che no àn puartât dongje nissun risultât, fasint e rangjant ce che a fasin altris impen di fâ ce che nus covente pardabon. Sul furlan si à fate une politiche di retrovuardie, di difese, al puest di azions par cressi e par lâ indevant, dulà che al baste viodi i risultâts de leterature furlane par vê conferme di chest, stant che e va denantdaûr, segnant il futûr de nestre lenghe.»
Luca Zoratti