ATUALITÂT – Aghe publiche e autonome

«O soi content dal risultât ancje parcè che nô o vin un contenziôs cul AATO e chest risultât al rinfuarce la nestre tesi che la gjestion dal acuedot e à di jessi fate in economie dai comuns o dai piçui consorzis di comuns» – al dîs il sindic di Liussûl Giorgio Morocutti, un dai Comuns che, cun Çurçuvint e cun For di Avoltri, al à tignût in propi la gjestion de aghe. «La aghe no si pues privatizâ. Chel che a volevin fâ al jere un altri assalt aes istituzions locâls, gjavant altri podê ai aministradôrs che a ‘nd àn aromai ben pôc. O soi simpri plui convint che bisugne tornâ a dâur fuarce ai aministradôrs par tornâ a cjapâsi chê dignitât che un timp e jere scontade ma che cumò aromai e je pierdude. La delusion e je tante sul fat di jessi stâts lassâts di bessôi cence che nissun ti vegni a domandâ se ti covente alc: ti clamin aes riunions dome par dî di sì ai lôr progjets di unificazion di comuns.»
«Par chel che al rivuarde il nestri piçul comun – al dîs Dario De Alti, sindic di Çurçuvint, il comun dal Friûl cul plui alt tas di afluence aes urnis – la sodisfazion e je tante: prin di dut la grande poie de int dal paîs a cheste aministrazion par chel che e sta fasint. Chest al è dome l’inizi. Il referendum e je dome une bataie vinte, no une vuere: nô o volìn di plui. Nô o domandin ae Regjon che e torni a dâ la autonomie decisionâl a ogni comun.»
«Pal moment, al reste dut invariât fin ae fin dal an – al zonte il sindic di Liussûl –. La bale e passe ae Regjon che e à di legjiferâ in merit. Il nestri obietîf al è chel di sburtâ in chest sens, di fâ in mût che a fasin une leç juste che e ledi inte direzion des richiestis ancje di chei comuns che a vuelin e che a rivin a gjestî il servizi in economie. I vecjos aministradôrs dal gno comun a àn fat il lôr dovê cuant che a coventavin metûts i bêçs intal acuedot e ju àn metûts, cence pensâ ae lôr figure ma aes esigjencis dai propris paisans. Cun chest spirt ereditât, jo o continui la bataie de aghe insieme cui miei coleghis e cun chei sindics che daûr des cuintis le pensin come nô.»
«L’esit dal referendum – al dîs Manuele Ferrari, sindic di For di Avoltri – al è un segnâl impuartant par nô: o vin par fuarce di tignî dûr e di lâ indevant su cheste linie.»
«O invidìn la Regjon – al continue Dario De Alti – a legjiferâ prime pussibil e a tornâ a dâ la autonomie decisionâl a ogni comun, ancje se vuê come vuê cheste Regjon e sta dineant il pan a chei comuns che no le pensin come jê. Il comun di Çurçuvint al è deventât la Stalingrado de Cjargne: assediât di chescj sogjets che, pal fat che no le pensìn come lôr, nus stan anulant. Ma nô o sin unîts.»
Al siere il sindic di Liussûl: «O sperìn inte sensibilitât dai nestris rapresentants intal dâ autonomie decisionâl serie a chei che a son stâts elets dal popul e che al popul a àn di rispuindi cence platâsi daûr di altris che il popul nol cognòs.»
Insome, di ce che si pues capî la Cjargne no à voie di molâ: anzit, i cjargnei a tegnin dûr e inmò une volte a son pronts a fâ valê lis lôr resons devant de robarie de aghe di mont.
Marta Vezzi