ATUALITÂT – “A le Patrie dal Friûl” in Rêt

Weblicôf pe Ostarie in place a Cjampfuarmit
A àn za finît il prin an di ativitât e juste su chestis pagjinis tal Setembar dal 2010 la Ostarie “A le Patrie dal Friûl” si presentave midiant di Oscar Olivo, ideatôr di cheste gjenuine ativitât di Cjampfuarmit. Chest an, Elena Olivo e Luciano Dozzi che a gjestissin la Ostarie di front dal municipi nus contin altris novitâts che a rivuardin la “vetrine” de lôr ativitât «No podevin trascurâ la promozion e duncje cumò che si sin inviâts, o vin cirût un sisteme par fâ cognossi simpri di plui la nestre Ostarie: www.alepatriedalfriul.com al è il nestri sît internet a pene screât».
Tal sît si pues cjatâ la presentazion de Ostarie, ma ancje imprescj utii tant che la pussibilitât di prenotazion e i contats par domandâ informazions.
«O doprarìn chest imprest par visâ i nestris clients ancje des ativitâts culturâls tant che incuintris e presentazions: dopo des primis seradis fatis in Primevere di chest an, o tornìn a scomençâ propit cuntune colaborazion cu la riviste “La Patrie dal Friûl” che e inmanee, lunis ai 26 di Setembar aes 8 e mieze di sere, juste te zornade europeane des lenghis, la serade “Fevelâ furlan al è fevelâ european” cun ospit Marco Stolfo che al presentarà il so libri “Il Tratât di Lisbone. Argoments e documents pe integrazion europeane”».
La Ostarie “A le Patrie dal Friûl” e à ancje une pagjine Facebook.
Christian Romanini