ATUALITÂT – 10mil Furlans in fieste

Si sa che il Friûl nol è dome chel dentri dai confins gjeografics de Patrie. Tai ultins doi secui, tancj a son partîts ator pal mont. Cussì al è sucedût che tal 1879 in Argjentine al è rivât tal teritori nazionâl dal Chaco un grup di emigrants furlans che a àn fondât Avellaneda de Santa Fe, une citât che vuê e conte passe 23.000 abitants.
In chê volte a jerin stâts tirâts dai beneficis de Leç de imigrazion e colonizazion n. 817 promulgade dal president argjentin Nicolas Avellaneda. Ogni famee e veve ricevût trentesîs etars di teren e, dopo vê sboscât la vegjetazion fisse che e taponave chês tieris, a cominçarin a dedicâsi a la ativitât agricule, passant lis stagjons cu lis ativitâts tradizionâls de vite contadine furlane: il lavôr de campagne, il semenâ, il coltâ e il cjapâ sù i prodots. La vore cence padin, la unitât familiâr e i principis cristians che a tignirin chei pionîrs furlans, frontant lis dificoltâts e cence dismenteâsi de Patrie, a continuarin di gjenerazion in gjenerazion.
«Ancjemò vuê, dopo 130 agns, chescj valôrs a restin come carataristichis distintivis di cheste comunitât» al conferme Claudio Violino, assessôr regjonâl a la agricolture che al à partecipât a lis celebrazions dal aniversari «O ai viodût un Friûl gjenuin ancje se lontan: mi son vignûts i sgrisui pe emozion a viodi cheste int che a cetancj km di distance e manten cun braure lis sôs lidrîs furlanis e a rivendiche cence pôre la sô identitât furlane».
Christian Romanini