ASSEMBLEE DAL CLERO 1975. Un grant moment di comunion e di sperance

Ai 25-27 di Jugn dal 1975 e je stade fate la Assemblee dai predis de diocesi di Udin. Un fat di straordenarie impuartance pe novitât e pal grant e franc dibatit che si è svilupâts in chei trê dîs tra i predis e pes sperancis che e veve impiadis te nestre glesie. Si jere a 10 agns de conclusion dal Concili,. Tune grande clime di dialic e di confront. Mi impensi che pre Checo Placerean tal prin intervent al à scomençât cul domandâ di lei il verbâl de ultime assemblee dai predis fate “ai timps dal patriarcje Bertrant”, seguide di une grande ridade gjenerâl.
O ripuartìn culì une memorie inedite di pre Antoni.
pre Roman Michelot
✽✽ Inte mê vite o ài vude ocasion di vivi tancj avigniments in maniere indirete, traviers de relazion e des sensazions dai protagoniscj. O feveli di fats come la rivoluzion francese, chê russe o altris grancj moments che a àn verementri dividude la storie intun prin e intun dopo. O crôt di vê podût metimi in sintonie cui protagoniscj parcè che une esperience simile, plui in piçul ma compagne te sostance e te cjarie emotive, le ài vivude in chel an e in chei dîs. Moments di vere comunion e di vive sperance.
✽✽ O vevin dibisugne, dopo dai disastris economics e plui ancjemò spirituâi di Zaffonato e in chê clime di sfâs e di disperazion che si le palpave dapardut, dal seminari ae ultime canoniche. Po stâi che la grande dibisugne nus vedi fat viodi plui biel di chel che al jere il fat, ma par me a son stadis zornadis straordenaris.
✽✽ Le vevin preparade a dovê, cun relazions, discussions, dibatiments, barufis, strategjiis, cenis, bevudis, ridadis… Diu, ce zornadis! No sai cemût clamâ il nestri ategjament spirituâl: se goliardie o ingjenuitât o fede mistiche. Parcè che bisugne jessi dome ingjenuis o mats a pensâ di cambiâ une struture reazionarie par costituzion come la glesie. Epûr o jerin convints. E cuant che si partive a buinorone des nestris monts par vignî jù a incendiâ di vivarositât la barache, si sintivin come i partigjans cuant che a levin a puartâ une svintulade di libertât. ✽✽ E cuant che sore sere si tornave sù, stracs di vueli sant e cun cualchi gotut di plui, o sintivin di vê metût un tasselut gjenuin par une cjase gnove. Bisugne jessi stâts li come che o sin stâts nô, il nestri grop di Glesie Furlane, par capî ce che o intint di dî. E ogni volte che o lei il vanzeli di Zuan, chel di Nicodem che al à di tornâ a nassi, jo o pensi a colp ae assemblee dal ‘75. No mi vergogni gran: mi sint e mi sintarai simpri fi di chê assemblee.
✽✽ In chei dîs benedets o ài sintude, pe prime volte in maniere cussì vive, la sodisfazion e la braùre di jessi furlan e di jessi predi. Mi soi sintût a part di un grant popul e di vê un gran destin ancje par chel che al rivuardave il so avignî. Ancje l’ultin paîs dal mont, come chel che o jeri jo, mi à someât une robone. Parcè che al jere un tasselut de glesie e dal popul furlan.
✽✽ Si à tacât, tal miercus, cun 394 predis, e si à finît, tal vinars dopomisdì, cun 315. A bastaressin chescj numars, che no si son ripetûts plui, par dî la grande sperance dai predis furlans e se a son salvadis.
✽✽ Si veve za tal cjâf la idee di assemblee permanent. Se po dopo il vescul e il consei pastorâl e la cubie curiâl a àn fat lâ in vacje il progjet di une diocesi in stât di assemblee, la colpe no po jessi ni di pre Checo ni di Borgo, ma di chei che a àn simpri vût il tamon e che a àn zuiât a fâ i democratics savint che, une volte sierade l’assemblee, il comant ur sarès tornât a lôr. Al è il câs dal Vanzeli: dal diaul che al torne cun siet diauluts un piês di chel altri. Chest al sta a dimostrânus che la curie e la jerarchie e je propit di “istituzion divine”. Magari par ledrôs. ❚
pre Antoni Beline