ASSEMBLEE DAL CLERO 1975. 1975- 2015. La Assemblee dal Clericât cuarante agns fa

Te messe di avôt ai Sants Ermacore e Fortunât di domenie ai 19 di Lui a Aquilee, si è ricuardât un moment storic pe Glesie locâl e pe nestre int. O vin pensât di meti jù un pocje di chê storie parcè che la robe piês e sarès chê di no savê che e je stade. E une storie che e reste dome te memorie di chei che le àn vivude no va lontan.
1975- 2015. La Assemblee dal Clericât cuarante agns fa
In chei dîs achì la storie e à segnât un bot che forsit in pôcs di lôr a àn sintût. Tai dîs di Jugn di cuarante agns fa si è metude adun une vicende uniche: la Assemblee dal Clericât de diocesi di Udin, cun a cjâf l’arcivescul Battisti.
Si podarès sintîsi lontans di chês cuistions se no si provàs a insuazâ il dut. Une storie che e veve dismot za di un pôc un trop di predis che a vevin tignût a batisim il Moviment Friûl tal scomençâ dal 1966 e te Mozion dal Clericât tal 1967. Ancjemò prin, a vevin tacât a domandâ une Universitât pal Friûl. I argoments no mancjavin, ma a jerin in pôcs a bati la grancasse par fâsi sintî. Bonsignôr Battisti al à vude la sensibilitât di prestâ orele a ce che chescj predis a disevin, ma forsit no fin insom il cûr. Dut câs, in chel timp une Glesie – che si podarès clamâle profetiche pe sô int – e faseve sintî la sô vôs, une vôs fûr dal coro. Nancje a nivel politic chestis posizions a plasevin trop, parcè che tal palesâlis – par fuarce – a deventavin une critiche, par vie che i sorestants no lis vevin realizadis. Un Friûl sierât tun destin decidût di altris e une dirigjence politiche imberdeade tes glagns de macropolitiche de Vuere Frede e tai berdeis des ideologjiis dai partîts. La int? Simpri plui sotane, cence vôs o almancul la sô vôs no je stade regjistrade de Storie documentade. Cussì, in chel clime, par man di pre Checo Placerean  e di altris 54 predis e cul vescul, a pensarin di meti adun il clericât udinês par provâ a meti ordin dentri de diocesi. Leint i ats de Assemblee e i coments di chel periodi, si pues viodi benon la presince dai protagoniscj e intivâ il clime. Di une bande Glesie Furlane, minorance organizade e compate ator di pre Checo. Di chê altre, un grup che al veve tant che protagonist principâl pre Pieri Biasat che a sô volte al veve daûr il grup di Lettere Friulane; tal mieç, la maiorance, chei che pre Toni Beline al clamave i GUC: i predis de Glesie Udinese Cidine … che però no tasevin e ancje i GUI: Glesie Udinese Indurmidide. A cjâf de assemblee il vescul Battisiti, scuasit scliçât di tantis pressions. Fûr di chê assemblee, une stampe invelegnade che cualchidun e alimentave. Intun clime par nuie idiliac, e jere une grande oportunitât par fâ une fotografie dal Friûl in rapuart ae sô Glesie e pal aiar gnûf che al rivave di Rome dopo il Concili Vatican secont.
Il struc al è stât un document, li che la Glesie udinese si cjapave caric de valorizazion de lenghe e de culture dal popul, ma che di fat no jere rivade a cjatâ une sintesi tra lis diviersis animis.
La conclusion le lassìn aes peraulis di pre Checo, ditis la buinore dai 25 di Jugn dal 1975:
“ (…) Une glesie che no sa riscjâ in chest mont, no je sigure sul dulà che e va. E reste simpri un mani di pale in man di cualchidun. Come che al è sucedût… Par la cuâl, o scugnìn riscjâ. Cjalait un fenomen, chel de emigrazion. Cent agns di emigrazion di masse o vin vût. Nô, vino cjapât lis lôr posizions? Vino patît cun lôr o sino stâts i predecessôrs dai uficis di colocament pes massariis? Masse voltis no vin podût alçâ la vôs, parcè che, se le alçavin, o pescjavin i pîts a cualchidun..
(…) Un predi al pues fâ dal ben dome se al è cul popul come un pes te aghe. E alore, se no sês cul popul, o sarês cun cualchi altre aghe.” ❚
Redazion