Sfuei Mensîl Furlan Indipendent
Archivi de Patrie

ART-Â. Sticeboris, bocjadis di ossigjen pe art furlane

............

In timps di crisi, no dome economiche, ancje di ideis, si à bisugne di cambiâ aiar. Al è chel che e cîr di fâ, dal 2006 a Pavie, la associazion culturâl «Etrarte», fate di Gloria Deganutti, Raffaella Garzitto e Elena Tammaro, proponint, cun coragjo, rassegnis di art contemporanie cun zovins dal Friûl-Vignesie Julie, e che a van sot dal non di «Sticeboris». Un intindiment marcât chest an ancje dal titul simbolic de mostre: «O2(f) Ossigjen furlan». Ossigjen tant che soflade di vite, indispensabil pe art e pe ispirazion creative.
Di elements di furlanetât, cheste rassegne a ‘nd à un grum. A scomençâ dal non. «Sticeboris», par furlan, al vûl dî tignî sù lis boris, ma ancje stiçâ. Al conte ben la idee iniziâl dal progjet, chê di tignî vive la part cidine de ment, des emozions e de inteligjence a traviers dal confront e dal rinovament di un lengaç contemporani a plui nivei. Furlans a son i artiscj clamâts tai agns a presentâ lis lôr voris, magari migrants, in Italie o tal forest, tant che in cheste edizion. Artiscj che si confrontin cu la nature, la storie, il fâ art te societât e te proprie comunitât.
E furlane e je la suaze principâl di chestis mostris: vile Beretta, dulà che Vittorio Cottafavi al zirà part des senis dal cine «Maria Zef», piere fondamentâl de produzion culturâl di cjase nestre, e che cumò e da acet, tra corts contadinis e arbui esotics, ai talents furlans. Plui di cualchidun cun chest ambient al à decidût di interagjî. Tant che Enzo Comin, poete, videomaker e fotograf di Pordenon, cu la sô opare «Stiçât». Achì la fotografie e vîf e e respire intune instalazion che e contamine lis parêts, il paviment e il fogolâr furlan, lûc des tradizions, leât al passât di ogni furlan, e che al devente testemoni diret de avanguardie contemporanie. Il progjet al nas e al vîf tal fogolâr. Metris di cjarte fotografiche e peliculis di negatîfs a vegnin fûr dai mobii de cusine, dal rubinet, dai barcons. Ma il centri de esplosion espressive al è il fûc dal fogolâr: stampis fotografichis, tant che fum, a vongolin e si poin par tiere. E su lis parêts, scarts di fotos recuperadis in cjasis bandonadis, rielaboradis a man e stampadis su cjarte di mûr, che a fevelin di un ambient familiâr domestic.
Tal foladôr, prontat dai architets Tommaso Michieli e Paolo Zardo e de scultore Francesca Ragusa cun materiâi sintetics e lavorâts a cjalt che si lein ai spazis rustics in maniere une vore armoniche, si reste cjapâts dal video, fuart te sô denunzie sociâl, di Michele Innocente. Al fevele di sfrutament, di int che e lavore siet dîs su siet, des vot aes dîs oris in dì, fûr de legalitât, a temperaduris altissimis e respirant materiâi tossics. Al conte cemût che ogni zornade al è un mûr di scjalâ viers il desideri di libertât. Une biele bocjade di ossigjen, indispensabile ae cressite de nestre cussience, par resonâ fûr di schemis omologants e cjalâ il mont te sô complessitât.
Erika Adami
___________________________________
CE FÂ
Otante oparis che a riproponin lis primis sferis dai agns Sessante, i dissens di studi, i modei in arzile e zes, fin aes ultimis oparis no finidis di Luciano Ceschia. A son in mostre li dal Foladôr Boschetti de Tor di Manzan fin ai 5 di Lui, il vinars des 4 e mieze daspomisdì aes 7 e mieze sot sere; sabide e domenie des 10 e mieze di matine a misdì e mieç e des 4 e mieze aes 8 di sere. Lis sculturis sferichis a coniughin «l’un, il langobart, il barbar educât», tant che al fo definît plui voltis l’artist, cu la vision pure e tindude al assolût che lis sferis a dan fûr te lôr lungje storie. «Nassite de sfere» e à par titul la esposizion, che e mostre, midiant de concezion «espansive» di Ceschia, un mont culturâl che al à segnât la ricercjie creative dal secont Nûfcent furlan.

Int di Cjargne / Magjie a Cjarsovalas

Marta Vezzi
Un dai lûcs dai Pagans in Cjargne Cjarsovalas, il paisut dai Pagans, al è sore Val e Rualp, frazions dal Comun di Darte, a 1.350 metris sul nivel dal mâr. “Al è un dai lûcs indulà che o puarti di plui la int – e conte Fides Banelli, mestre in pension che a fâs ancje […] lei di plui +

L’Editoriâl / Cuant vignaraie la “adunade” dai furlans?

Walter Tomada
Tropis vitis aial il Friûl? Al sarès biel se a’ndi ves siet, come i gjats: o cetantis di plui, come i protagoniscj di tancj videozûcs che ur plasin ai nestris fantats. Magari cussì no, dut câs, un popul nol è mai bon di vivi dôs voltis: se i tocje disparî, al sarà par simpri. Se […] lei di plui +

Festival di Poesie Alpine / Autôrs di Ladinie, Grisons e Friûl a confront

Gabriele Zanello
Tal incuintri di Bressanon ancje lis vôs di Gigi Maieron, Nelvia Di Monte, Gianluca Franco, Francesco Indrigo, Luigina Lorenzini e Antonella Sbuelz Tra lis comunitâts furlane, ladine e rumance a esistin relazions identitariis e culturâls une vore antighis, che massime tai agns Setante e Otante a àn vût un moment di gnove sfloridure ancje sul […] lei di plui +