ART-Â. La poesie dal mont tra sium e realtât

Si divît tra Udin, dulà che al è nassût, e Berlin, citât che i da acet par cualchi mês al an. Lorenzo Missoni, artist furlan pôc plui che cuarantin, no le mande a dî. Al è critic cul Friûl e cu la Italie in gjenerâl: un paîs dulà che nol è nie di contemporani, masse leât aes tradizions, dulà che «la culture e ecuivâl a intrateniment». Missoni nol sparagne tacadis nancje a realtâts culturâls tant che il Css Teatri stabil di inovazion dal Friûl-Vignesie Julie, che al à colaborât pal passât: colaborazions, al dîs, che «no judin l’artist ni dal pont di viste economic ni professionâl, che a servin dome a justificâ lis spesis di chestis realtâts». A sintî l’artist, restâ te tiere di origjine no lu à judât. Di stes, al à une lungje storie espositive in Italie e tal forest.
La dimension poetiche e visionarie al è il fulcri de ricercje di Missoni, che, cence cedi a facii lirisims, al è bon di formulâ univiers in ecuilibri perfet tra il sens dal dramatic e la vocazion ae sintesi. Tra vision e realtât e jere la instalazion pal Spazi Fvg dal Centri di art contemporanie di Vile Manin – une stanziute iluminade di une lûs debile, cun ombris e sagomis e il sotfont di une musiche dolce –, dulà che Missoni al à zuiât cu la percezion dal spetatôr e cu lis sensazions riclamadis di un spazi e di une atmosfere. La sô atenzion si è poiade cumò sui libris, intun percors li che al continue a lei il mont che i sta ator.
O sielzìn di poiâ il voli suntun progjet dal artist, sierât aromai di agns, che si pee cul teme di chest numar de «La Patrie dal Friûl». Missoni al è, di fat, l’autôr di un erbari, nassût dal messedament di plui elements vegjetâi, tocs di plantis cjatadis dilunc des spassizadis di chest moderni alchimist e metudis insiemit tant che i ingredients di un striament par creâ gnovis speciis – 150 sù par jù – intune personalissime vision de nature, fie de sô imagjinazion e creativitât, dal so gust estetic. Semencis, stams, pistils, lidrîs a son stâts doprâts tant che tocs di un puzzle. L’erbari dal artist nol rimande ae realtât, al vûl fermâsi su la poesie de creazion plui che sul ogjet cre