Tal segn incisîf e sufiert de sô piture al è il spirt dal Friûl de Basse. Tes assembleis dai lavorents, la storie di cheste tiere e de sô int. Giuseppe Zigaina al è prin di dut artist furlan, no tal sens che il valôr de sô opare al sedi confinât a cheste regjon, ma parcè che di cheste tiere, dal so orizont unic, al è l’interprete plui alt e profont. Chel che, miôr di ogni altri, de vision inamorade de planure che e cor jù fin ae lagune, e des storiis che le àn animade, al è rivât adore a creâ un paisaç gnûf, «tra enigme e profezie», jevant la sô art a valôr universâl.
Zigaina al à cjantât il Friûl, la societât dai agns sufierts dal dopovuere e des malcuietis stagjons seguitivis. Vuê, al testemonee la ariditât di un mont che al à pierdût i siei valôrs plui autentics.
Cuntune siore selezion di 130 oparis, di cuant che al à tacât a piturâ fin in dì di vuê, la esposizion a Vile Manin e segne e e aprofondìs dute la parabule artistiche dal pitôr di Cervignan, un dai plui impuartants artiscj talians dal Nûfcent. Dal prin realisim sociâl, coltât tal segn di Picasso e dal cubisim, de vicinance al Front gnûf des arts, Zigaina al è passât prime a une indagjin plui gjenerâl de condizion dal om e de nature cui innomenâts ciclis sui «Gjenerâi» e su lis «Roncjadis», e, po dopo, a une piture simpri plui astrate e informâl che e cjol sù la essence plui che la parence des robis e de vite, cui siei ombrelûs e lis sôs ambivalencis. La nature e torne in prin plan, ma in forme di pinsîr, rarefate in pôcs segns par fâ spazi al vueit dai valôrs mangjâts dal carûl de modernitât e di altris insets.
La antologjiche di Passarian si vierç cun «Il zirasol» dal 1942, une nature muarte che e je za un paisaç, e si siere cuntun cuadri – «Viers la lagune» –, piturât pe ocasion. Tal mieç, lis voris mestris di un neorealisim cun lidrîs autobiografichis, fatis jenfri il 1949 e il 1955. A vierzin la sezion lis famosis bicicletis cui parepantans blancs dal timp de vuere. Cence la biciclete, comprade di so pari cui bêçs vanzâts de vendite de cjasute che al veve fat sù a Cervignan, par paiâ dai debits, Zigaina nol varès podût movisi di Vile Visintine, dulà che al jere lât a stâ cu la famee. Nol varès viodût lis manifestazions operariis dal Prin di Mai a Cervignan, che po al à piturât. Su lis telis al à fermât lis bataiis civîls e politichis pal progrès de int de Basse, lis assembleis corâls dai lavorents sul Cormôr, cui contadins intabarossâts. Parsore, bandieris rossis, ma cence falcets e martiei, lis bandieris dai lavoradôrs, no dai partîts.
Centrâl te mostre di Passarian la grande tele de Galarie di art moderne di Udin, «Assemblee di lavorents sul Cormôr», esponude ae Bienâl di Vignesie dal 1952. Figuris di contadins in semicercli cun svangjis e falcets intun univiers di vert e blu. Su chest sfont si movin trops di lavorents e operaris che a disfidin une vite di faturis dome cun falcets e bicicletis, tant che te «Assemblee di lavorents sul Cormôr» dal 1954. L’artist – realist cence retoriche, no pitôr militant – nol rinunzie ae bielece dal colôr, no i interesse che i personaçs a sedin ricognossibii, i interesse la tiere dulà che a stan. Une tiere dulà che l’om al è in rivolte. Tant che tal siopar par ledrôs dai contadins che a vignivin a lavorâ tal liet dal Cormôr fin di Gruâr. Cidins, ma cu lis bandieris che a svintulavin. Framents de nestre storie, che la mostre di Vile Manin e jude a capî miôr.
UNE VITE PE ART_ Pitôr, incisôr, scritôr e documentarist, Giuseppe Zigaina al è nassût a Cervignan, dulà che al vîf, tal 1924. Al à tacât a piturâ di zovin. A 19 agns al esponeve bielzà inte Fondazion Bevilacqua La Masa di Vignesie. Di fonde l’incuintri cun Pasolini tal 1946: cun lui Zigaina al à vût un rapuart artistic e uman che al è sorevivût ae muart dal poete (e je preseade in dute Europe la ativitât sagjistiche di Zigaina par decifrâ la opare di Pasolini, di mût di cjatâ te muart cirude e inmaneade dal poete la clâf di leture par capî la sô poetiche). Tal 1950 al à vinçût il premi Fontanesi ae Bienâl di Vignesie (dulà che al à esponût plui voltis, la prime tal 1948). Lunc e impuartant il percors espositîf di Zigaina, che lu à puartât dispès tal forest. Tal 1965 al à scomençât a sperimentâ la incision (massime la aghefuarte), une tecniche significante te sô produzion.
Fin ai 30 di Avost, a Vile Manin di Passarian, si podaran viodi 130 pituris dal artist di Cervignan, rivadis di racueltis publichis e privadis, dentri de mostre «Zigaina – Oparis 1942-2009», par cure di Marco Goldin, vierte ducj i dîs, fale che il lunis, des 10 di matine aes 7 sore sere. Informazions e prenotazions al numar 0422/429999.
Erika Adami
__________________________
CE FA
Intun paîs che e cjale plui al passât che al avignî, i artiscj a scugnin dispès scjampâ tal forest. Ancje chei furlans. La associazion culturâl «Etrarte» ju clame dongje a Pavie pe gnove edizion di «Sticeboris», rassegne di art contemporanie rivade ae cuarte edizion. Sedis zovins (Claudio Cescutti; Enzo Comin; Carlotta, Michele e Mara; Virginia Di Lazzaro; Silvia Giusti; Michele Innocente; My Favorite Colour in colaborazion cun Theo Teardo; Monica Passalenti; Tiziana Pers; Laura Pozzar; Lara Trevisan; Kerotoo) a testemonearan l’estri e il ferment creatîf di cheste regjon intun laboratori viert sul teme «International and local. Artisti friulani e_migranti». A ricuardâ la ecelence furlane ancje i vincidôrs dal secont premi mondiâl di fotografie di Los Angeles: Micky Modo & Spire. Dai 15 di Mai (scree aes 6 e mieze sot sere in vile Beretta cu la performance musicâl dal grup «Il moro e quasi biondo») ai 31 dal stes mês, ogni vinars, sabide e domenie, des 4 daspomisdì aes 10 di sere, si podaran viodi lis voris dai sedis artiscj, scuasi ducj migrants in Italie o tal forest. Jentrade libare.
Informazions sul sît: www.associazionetrarte.it
Sindic jo mame / “La nestre int no à mai molât. Covente fâ, no lamentâsi, par saltâ fûr dal pantan”
Walter Tomada
Alessandro Marangoni: la Aclif e deventarà istituzion di riferiment pai furlans “La Assemblee dai sindics furlans e je une realtât necessarie. E cul timp e deventarà ancjemò di plui un pont di riferiment pe identitât de nestre int”. Al è sigûr di chest Alessandro Marangoni, prin citadin di Dartigne, che al crôt tant inte Aclif […] lei di plui +
(L)Int Autonomiste / Autodeterminazion e dirits pai popui, uniche strade di pâs
Dree Valcic
✽✽ No podìn sigûr fâ fente che la vuere in Ucraine no dedi une serie di problemis intrigôs ancje aes fuarcis che si riclamin ae autodeterminazion dai popui e al ricognossiment dai dirits des minorancis etnichis. Prin di dut, ce che al è daûr a sucedi al è la ultime dimostrazion che chei problemis no […] lei di plui +
L'editoriâl / Macroregjons, une oportunitât di racuei
Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +
Ricorence / Pier Pauli Pasolini om contraditori e segnâl di contradizion
Pre Toni Beline
Tal centenari de muart di Pier Pauli Pasolini o ripuartìn a tocs la tierce part dal libri scrit di Antoni Beline tal 1993 ‘Trilogjie tormentade’, che e rivuarde propit il poete di Cjasarse I. RISPIETÂ IL MISTERI DAL OMLa sience plui dificile e je la cognossince di se stes. E se al è grivi cognossi […] lei di plui +
Int di Cjargne / La sporte de spese a km zero a ‘La Polse’ di Chiara e Matteo
Marta Vezzi
Di cualchi dì al è stât screât un gnûf servizi intal spaç e ristorant di Chiara e Matteo “La Polse di Cougnes” a Zui, indulà che si pues cumò cjatâ e comprâ prodots locâi. “La idee e je nassude pal fat che za nô intal ristorant o doprìn avonde materiis primis dal teritori – e […] lei di plui +
Il numar in edicule / Jugn 2022
Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +