Se la manifestazion che di simpri e à caraterizât Sant Denêl e la ativitât des sôs fabrichis di persuts no si clame plui Aria di Festa, ma Aria di FVJ no vin di maraveâsi e nancje avilîsi masse.
Anzit, o varessin di jessi contents che ancjemò une volte il centralisim regjonâl al mostre la sô vere muse di ignorant paron. Cambiâ non a une manifestazion cognossude in sens storic al e dâsi une martielade sui coions, daûr di ogni principi publicitari. Ma di chest a varessin di preocupâsi lis aziendis produtoris, che invezit a restin cidinis, forsit preocupadis che no i detin i contribûts regjonâi se a disessin di no.
Par nô, autonomiscj, un altri segnâl di cemût che al va indevant il procès di disfurlanizazion, dulà che il marchi Io sono FVG al devente une campagne ossessive di propagande, cuntun stîl che al ricuarde i piês metodis di persuasion. E simpri mancul oculte e simpri plui arogant.
Al reste aromai dome che la dificoltât semantiche di clamâ i abitants di cheste regjon effevuggini.