E svolave Angela, lant daûr dai siei siums di liceâl. Si svicinave aes sperancis dai zovins de sô gjenerazion cu la stesse voie di cognossi e di cambiâ il mont che e veve tal frontâ, cun serietât e passion, i classics latins, la leterature e la storie, intes aulis dal Stellini.
E cjapave la coriere adore la matine, cualchi volte si fermave a studiâ li di Augusto Casasola in plaçâl Cele, masse dongje de sofite di Toni Capuozzo par no restâ inmagade dai viers de beat generation che a vignivin ciclostilâts là in version provinciâl. Che Borc Graçan al fos in cualchi mût une sielte di vite predestinade no si pues savê, ma ciert clamâsi Felice di cognon e jessi a stâ in androne Paradîs nol pues sucedi par câs, se no a une persone che e fâs Angela di non. Cetantis voltis che o vin ridût parsore, cjatantle intant che e montave sù su la sô Mini e jo o saltavi fûr dal garage che, tant par cambiâ, si cjate intune altre des siet andronis di vie Graçan.
I miei contats cun jê dopo de scuele a rimontavin aes primis edizions dal Pali Studentesc, segnadis di ce che al restave dal “moviment” e de sô voie di cambiament culturâl partint de scuele e dai zovins. E ancje i segnâi di chel becâsi vicendevul tra jo che le tacavi pe pocje produzion par furlan al Pali e jê che e rispuindeve ustinade intal no volê fâ dome che la retoriche de marilenghe.
Dopo, il so rûl decisîf inte “riapropriazion” di Pasolini de bande dal Friûl e il gno ricognossii dute la positivitât, complice chê atmosfere magjiche dai Colonos dulà che lis diferencis a deventin dialetiche dal fâ. Ma cuasi a slontanâ la vecjaie e lis sôs magagnis, al jere stât propri il ’68 a viodinus dibati insiemi l’Istât passât, intun mût di dialogâ public, ma tra nô cifrât in maniere intime, par musis e fats cognossûts in chei agns. Dopo, ancjemò un invît, l’Invier passât, par une gnove iniziative in citât intune vision de vite culturâl divierse dai circuits uficiâi: une piçule stanzie che vuê mi vise une vecjo cjast. I ultins incuintris in ocasion de presentazion des listis pal Pat. E JERE ENTUSIASTE pe sielte di Avoledo di candidâsi, ma in gjenerâl par cheste gnove propueste. I risultâts no ju à viodûts, ma o soi sigûr che cualchidun jai à comunicâts. E jê, ju ur à dât acet cuntune bocje di ridi des sôs.
di Dree Valcic
