Andrea Bellavite, l’ex plevan deventât sindic

Nassût a Verone tal 1959, Andrea Bellavite al è a stâ a Gurize dal 1968. Ai 5 di Jugn al à vinçudis lis elezions di Dael deventant sindic cul 51,45% dai vôts di chei citadins che a son stâts siei parochians tai agns Novante.
Dal pont di viste dal dirit canonic, al è inmò predi, ma cuntune sospension a divinis che no i permet di esercitâ lis sôs funzions eclesiastichis (cundizion no ireversibile, ndr).
al è teolic, gjornalist e president de associazion culturâl Forum Cultura per Gorizia/Guriza/Gorica, e lis sôs primis peraulis dal discors di gnûf sindic di Dael a son stadis: «La culture e à di jessi la fonde di ogni at de politiche».
Par se al à tignût il referât ae culture, al turisim e ae ativitâts produtivis, e al à declarât di volê pontâ su la valorizazion dal Iter Aquileiense (www.camminoceleste.eu) pe valorizazion de culture locâl intune clâf di svilup economic turistic dal paîs: «Al è propit a Dael che e je nassude la idee di chest pelegrinaç» al ricuarde cun emozion, jessint tra chei che tal 2006 a àn contribuît a fâ nassi cheste esperience «Cui amîs de associazion Iter Aquileiense e dal circul Navarca, cul so president Aurelio Pantanali, o vin volût creâ chest itinerari che al è simbul de amicizie dai cuatri popui (furlan, talian, sloven e todesc) che in Friûl si cjatin su la Mont Sante dal Lussari».
il sindic bellavite al à ideis claris ancje su la cuistion furlane «O soi nassût a Verone e o amet che, ancje se lu capìs dut, no feveli inmò tant par furlan, ma o soi convint dal grant valôr de lenghe e de culture dal Friûl: lu ai fat tai agns Novante cuant che o jeri plevan e o continuarai di sindic te valorizazion de lenghe furlane parcè che une sô eventuâl pierdite e sarès un dam no dome pai furlans, ma par dute la umanitât». ❚
✒ Christian Romanini