Aldo dai Ros: il pont de cariere, intun moment di polse de sô ativitât

«Par fâ dal mâl baste nome un secont, par fâ dal ben la vite di un om» (dal toc A là sù dal CD La vite e la Muart 2011).
Cussì, cu la sinfonie de sô ghitare e la cjantade strissinade Aldo Rossi, in art Aldo dai Ros, nus conte di vitis, di paîs, dal Friûl e de Cjargne.
Cjantautôr di Tumieç, trasferît di piçul di Udin, nus descrîf vizis e virtûts de nestre int. Cognossût in principi cul non Aldo Giorgi, al è stât diretôr artistic di emitents radiofonichis locâls e dal 1986 cun I Salvadis al puartave ligrie tes sagris di paîs. Al è cul 2004 che l’artist al met adun i tocs in lenghe furlane, publicant il so prin album di solist.
«In dutis lis cjançons che o ai scrit al è un tocut di me, piçul o grant che al sedi.»
Di une vite al scrîf cjançons par fruts e al à cjapât varis ricognossiments. Tancj di chescj, come che nus conte lui «A valin plui di tancj regâi. Par fâ un esempli, o ai savût che un dai miei tocs al è stât cjantât ae recite di fin an dai fruts de scuele de infanzie di Mortean. O soi stât une vore content.»
Noaltris lu ricuardìn a partî dal sô prin album di solist: Miôr curte (2006), cjançons in mancul di trê minûts. Tal timp al compon ancje tocs par Manuela di Centa, siglis par Carnia Canta, Telefriuli, il Tocai e manifestazions variis e al publiche cutuardis gnovis cjançons cul Cd Furlan (2007) e il secont volum Curtis, ghitaris e curtìs. Miôr curtis (2008). Il dopli album La vite e la Muart (2011), recensît su la Enciclopedie de musiche taliane, al à dentri invezit vincj tocs. Tancj a son une vore preseâts, come Di un Pari, une cjante che e dure 75 seconts ma che e conte une storie lungje 17 agns, dedicade a Beppino Englaro, Cjalde chê sere in memorie dai 6 di Mai e Grant dedicât ae mari. Chest album al à dentri no dome inedits ma ancje covers e poesiis cjantadis, tant che Preiere di Nadâl e Si podès.
Tal 2013 al jes Miôr fale curte, une racuelte des 28 curtis scritis dal 2006 al 2014, e infin tal Otubar 2014 al prodûs Ta cove de Strie. Dopo chest ultin CD, Aldo al continue a scrivi simpri restant te suaze di tocs tant che Strie e Il Gjaul, cu la sielte duncje di peraulis in marilenghe che «a cjantin di bessolis nome a sintilis» e o spietìn prest un gnûf album.
Dai siei idui nus conte: «O ai bisugne di sintî la musiche dai grancj, mastiâle, glotile e dopo la torni a spudâ fûr ae mê maniere. Cjapâ ispirazion par me al vûl dî sintîmi fradi di un altri artist; di fantat si tratave di Giorgio Ferigo, Dario Zampa, George Brassenes, Paolo Conte e Fabrizio De Andrè. Ultimamentri, Gianmaria Testa, Alessandro Mannarino, Tom Waits e Jack Savoretti. La ironie pes “Curtes” di Giorgio Gaber, Paolo Rossi e Dario Vergassola.»
Aldo dai Ros al è simpri atîf sul Blog, Facebook e Instagram. Soundcloud, iTunes, Amazon e Google music a tegnin dongje dute la sô musiche e sul so canâl youtube www.youtube.com/alduti che al sta par rivâ a 200 mil di lôr che lu seguissin, o podês cjatâ videos autoprodusûts e inzornaments su la vite e la art di chest cjantautôr origjinâl, cjargnel, furlan.
✒ Moira Pezzetta