Al sta rivant il Premi San Simon 2017: no dome leterature ma ancje video

A saran disvelâts ai 23 di Otubar i noms dai finaliscj dal San Simon, il premi plui prestigjôs de letterature par furlan che di 38 agns in ca al à segnât la storie de espression creative in marilenghe. Baste dâ un cuc ai vincidôrs par cjatâ i plui impuartants inteletuâi di lenghe furlane: Amedeo Giacomini, Pier Antonio Bellina, Gianni Gregoricchio, Franco Marchetta, par nomenâ dome cualchidun.
Nol è dut câs un premi che al reste simpri compagn: anzit intai ultims agns il desideri continui di rinovâsi e di stâ al pas cui timps, al à puartât il Comun di Codroip (che al organize la manifestazion) a premiâ dôs categoriis di lavôrs:pe narative classiche la jurie presiedute di Carlo Tolazzi e à valutât la miôr racuelte di contis cuntun minim di 150.000 batudis; di chê altre bande, novitât in assolût e je la sezion par lâ a sielzi il curtmetraç plui biel  incentrât su la interpretazion libare dal teme La crosere, che al cjape ispirazion dal toponim di Codroip di divignince latine Quadruvium, crosere di cuatri stradis.Ultime novitât, la dimension internazionâl grazie ae colaborazion cul Ent Friûl tal Mont che al à garantit la difusion fra ducj i Fogolârs furlans.
Lis racueltis di contis presentadis a son stadis vot, di bon nivel e di une certe varietât sedi di gjenar che di divignince dai autôrs. Ai 23 di Otubar inte Biblioteche Civiche di Codroip a saran dome cuatri i finaliscj che a saran intervistâts: il public al sarà clamât a sielzi il miôr, ma dome ai 28 di Otubar, zornade di San Simon, al sarà consegnât il Premi.  ❚
✒ Redazion