✽✽ Un an gnûf, cui problemis di simpri e mai risolts, tacant dal destin dal popul furlan, simpri plui strent tra la smuarse de globalizazion e la sorevivence identitarie. Inciert e sbatacolât, tant che un sûr tal jenfri lis ondis, tra la omologazion e la cussience di se.
✽✽ A son doi tiermins, cuasi doi confins de vision dal mont, ma o vin di fâ riferiment continui a chei par no finî intal masanin de storie. Se di fat si indebilissin i fatôrs de proprie diversitât, il lôr spazi al ven cjapât daurman di cui che nus volarès ducj soldaduts in posizion di aptac devant dal model di disvilup des multinazionâls. E, par restâ al lengaç militâr, lis trupis inschiriadis cuintri di nô a son pardabon tantis e ben armadis. In prime file la potence economiche, cun po dopo chê politiche, ma no mancjin i “vuastadôrs”, o ben chei che cu la parvence dal dibatiment culturâl, a semenin di continui il dubi su la nestre stesse esistence, a calcolin provinciâl e superât il riferiment al nestri passât par analizâ il presint.
✽✽ A confondin lis aghis cun distinguo continuis tra il jessi “vierts al mont”, “fâ i conts cul marcjât” come se i furlans, includûts i imprenditôrs, a fossin ducj stupits e dispès no vessin capît prime di chei altris lis regulis dal zûc. A poker tu puedis ancje bluffâ, a briscule par vinci tu âs di fâ 61 ponts.
✽✽ A son pericolôs parcè che a fuarce di ripeti di decenis lis stessis stupidadis, cun ducj i mieçs pussibii, di chei di comunicazion aes cunvignis, si cor il pericul che a puedin someâ afermazions veris.
✽✽ Si trate, cemût che o savìn ben, di un scuintri dûr: o nô tant che popul o lôr tant che parons dal mont. Devant di cheste sfide no vin in assolût di sierâsi, di restâ in trincee spietant che la Crôs Rosse e trati pe nestre liberazion. O scugnìn invezit alçâ la astute, saltâ fûr de logjiche de sumission, di chel “siôr sì” che nus à fat simpri tant mâl.
✽✽ Convincìnsi ducj de lôr debilece intrinsiche, de prospetive falimentâr che nus ufrissin intun futûr no futûr, par vie che al è destinât ae autodistruzion dal planet e ae sopression di ogni diversitât.
✽✽ I furlans a vegnin de tiere, des monts e des planuris, des culinis, dal mâr e chest Friûl no lu molaran tant par facil, anzit no lu molaran mai. ❚
