Sul sît www.folkest.com al è za l’invît ae edizion 2016, ma prime di cjalâ indevant, al è ben fâ un belanç de edizion 2015, sierade a Spilimberc cul conciert di musichis rinassimentâls di Angelo Branduardi. Andrea Del Favero dal 1979 al è il diretôr artistic di Folkest (la prime edizion a San Denêl si clamave Fieste di chenti).
Andrea, il calendari 2015 al è stât siôr di ospits (tra chescj Hevia, intervistât su la Patrie di Avost dal 2015, ndr): se tu vessis di ricuardâti une serade, cuale ti vegnie iniment par prime?
A part Hevia, come tu âs bielzâ dit, e sperant che nissun al vedi di ofindisi, mi vignarès di dîti Bella Ciao a San Vît dal Tiliment. Une riedizion a cinquante agns di distance dal spetacul che al à fat capî che la musiche popolâr e veve dut il dirit e lis potenzialitâts di jessi sunade intai teatris, no dome tes ariis des cjasis contadinis e tes fiestis di place.
––
Cemût ise cambiade la vuestre ativitât tai ultins agns (burocrazie, tais dai finanziaments…)?
Dal pont di viste de burocrazie le vin plui peloche, nuie ce dî. O scugnìn vê une persone che e fasi dome lis parts di burocrazie pai spetacui, pacs di cjartis par ca! Tais di finanziaments… pesants, al pont che o vin scugnût no rinovâ i contrats a personis che a lavoravin culì. Zovins, che al vûl dî ancje l’avignî de culture in Friûl… no ben…
––
La Regjon e à sielt di pontâ sui grancj events targâts “friuLIVEneziagiulia”, voaltris cemût le pensaiso?
Li o fevelìn di becins de promozion turistiche, no de culture; no cognòs avonde i numars par podê dâ un judizi, ancje se mi somee che une regjon dulà che ancjemò si vîf a misure di om e in fin dai conts l’ambient al è ancjemò in buinis condizions, forsit o varessin di pontâ di plui su tantis piçulis iniziativis par fâ cognossi dut ce che di biel o vin.
––
Ce edizion saraie chê di Folkest 2016?
Un teme impuartant, vignût fûr resonant su la prime vuere mondiâl e sul dì di vuê: Frontieris. E suntun Friûl che al varès di scjassâsi, di movisi par confrontâsi cu la Europe e il Mont. O corarìn sui confins de Europe, de Finlandie ae Pulie…
––
Tu sês organizadôr, ma prin di dut musicist professionist: “La Sedon Salvadie” e je stade tra lis primis formazions musicâls a pontâ su la musiche furlane e par furlan. Nus spieghistu cheste sielte?
La Sedon Salvadie e je stade la prime formazion musicâl furlane a proponi chel che si clamave folk-revival, cjapâ sù la musiche de tradizion (un cjant registrât di une femine, un bal imparât di un sunadôr di bessôl…) e tornâ a sunâle cun voie e intenzion gnove. Di une bande o vin cjapât sù dai vecjos dut ce che o podevin (cuntun metodi sientific), di chê altre o sin montâts suntun palc par proponi un spetacul…
––
Ce vuelial dî “musiche furlane” e “musiche par furlan” vuê?
Une mê constatazion un vore lineâr un pôcs di agns indaûr mi à tirât intor un “anateme”, dome parcè che o ai dite che e esist une musiche furlane (e al sarès il câs di studiâle prime di fevelânt) e una musiche par furlan (cjantade par furlan su schemis musicâi che a vegnin di altris lidrîs). Dut achì… In dì di vuê jo o continui a sunâ musiche furlane, a studiâle, e se mi capite a puartâle fûr dal Friûl. Ogni tant mi capite di scoltâ cualchi biel disc di musiche par furlan.
––
In Europe ce aiar tirial su la musiche tradizionâl?
No mâl, di sigûr e je plui rispietade che culì.
––
Chest an il Premi Folkest ae cariere al larà a Luigi Lai, il plui grant sunadôr di “launeddas” (strument tradizionâl de Sardegne, ndr) che al à puartât un strument milenari tai taetris di dut il mont!
Nol è un câs che il premi al sedi lât a lui, chest an. L’impuartant al è vê la fuarce di resisti ae globalizazion.
Cui puedial cjapâ sù il vuestri testemoni tra i zovins?
In chest moment no lu sai, o speri che al vegni fûr! ❚
________________________________________________
BIOGRAFIE
Andrea Del Favero al à tacât a sunâ tal 1982 cu La Sedon Salvadie, che tal 1986 e à publicât un LP che al à fat storie: Il gri e la moscje, cun Giulio Venier, Glauco Toniutti, Emma Montanari e Marisa Scuntaro e i miôr vecjos sunadôrs dal Friûl.
Dal ’88 al ’92 al sunât cui Current, insiemi cul sunadôr di pive (uillean pipes par inglês, cornamusa par talian, ndr) irlandese John McSherry, Silvio Orlandi ae ghironde e Lino Straulino e cui MOIA – music of the Italian Alps.
Tal ’90 La Sedon Salvadie e à publicât Salustri, tal ’93 Faliscjes, tal ’95 Stories, tal ’99 Strades di cjants, Cjantade di Nadâl tal 2001 e Il cîl da l’Irlande tal 2003, cun Bubola, Chieftains, Nuñez, Zitello…
Tal ’95 al è diretôr artistic di Canti Randagi, su lis cjançons di Fabrizio De Andrè (dulà che La Sedon Salvadie è a cjantât Cjant dal pastôr) e al à cjapât il premi Moret d’aur.
Tal 2001 al è jessût il libri Villotte e canti popolari del Friuli e, insieme cun Giulio Venier, la prime antologjie di regjistrazions origjinâls dal Friûl, Scric Bic Scarabic. Tal 2012 The river’s Dream Band – Sava Suite, progjet pe UNESCO cun Grollo e Marusic.
Al è diretôr artistic di Folkest de prime edizion de Fieste di chenti tal 1979 e al à vût sunât armoniche, liron o percussions in plui di trente discs. ❚
✒ Christian Romanini
Une storie furlane / Orchestre a pletri Tita Marzuttini: passe cent agns di storie cence pierdi la sgrimie
Serena Fogolini
Giovanni Battista Marzuttini, al jere il 1884 cuant che un zovin marcjadant di farinis, Nicolò Serafini, al decideve di meti sù a Udin un circul mandulinistic, striât di chel strument che al veve vude maniere di scoltâ in gracie di un viaç a Rome.◆ Tirade dongje la int e soredut lis risorsis finanziariis, e tacà […] lei di plui +
A torzeon pal Friûl / “Der Voschank”, il spetacul des mascaris sauranis
Sara Traunero
La tradizion dal “Kheirar” e dal “Rölar” e cjape dentri dut il paîs Mascaris bielis e mascaris brutis, cun musis intaiadis intal len e cu lis liniis plui diferentis, a son lis protagonistis assoludis di une ricorence tant curiose che antighe: al è il Carnevâl di Sauris, intal dialet sauran locâl cognossût ancje tant che “Der Voschank”.L’aspiet […] lei di plui +
A torzeon pal Friûl / La maravee di scuvierzi il Carnevâl rosean
Diego Navarria
Cuatri amîs inmagâts de origjinalitât di lenghe, musiche e bai dal Cjanâl incjantonât jenfri lis Musis e la mont Cjanine In ce aventure che mi soi butât! Dut par lâ daûr di mê madone! Cumò, aes trê dopomisdì, achì in machine o sin in cuatri: jo, Mario Dean, 46 agns, professôr di talian tal Marinelli, […] lei di plui +
A torzeon pal Friûl / Il rituâl de Messe dal Spadon nus ripuarte ae ete dai Patriarcjis
Sara Traunero
La memorie e torne indaûr a Marquart, ma forsit la tradizion e je ancjemò plui antighe Ai 6 di Zenâr, in ocasion de fieste de Epifanie, il Comun di Cividât si prepare a celebrâ un rituâl tant curiôs che inmagant: e je la Messe dal Spadon, che par tradizion si fâs tal antîc Domo antîc. […] lei di plui +
Libris simpri bogns / Emilio Nardini, “Par vivi”, Udin, 1921
Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +
Interviste / Numb il cjan scjaladôr (e il so paron Thomas)
Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +