Al è jessût il bant pal Sant Simon, il storic premi leterari furlan. La edizion 2013 nus disarà se la nestre leterature e je daûr a saltâ fûr de “prognosi risiervade”

Il Comun di Codroip in colaborazion cu la Agjenzie Regjonâl pe Lenghe Furlane (ARLeF) al à publicât l’avîs pe 34e edizion dal Premi leterari in lenghe furlane Sant Simon par un romanç. I tescj, che a àn di jessi inedits e no scrits a man, a àn di rivâ li de Biblioteche Civiche di Codroip, in Vie XXIX di Otubar 3, dentri des oris 19.00 di Sabide ai 28 di Setembar dal 2013. La jurie è sarà componude di Pierino Donada, Carlo Tolazzi e Lorenzo Zanon (ARLeF), dal Sindic o di un Assessôr che lui al deleghe, e di Giorgio De Tina, bibliotecari di Codroip.
Al autôr de opare vincidore i larà un Premi di 1.500 euros e la Aministrazion Comunâl e podarà decidi di publicâ la opare premiade. Il bant complet si pues cjatâlu sul sît dal Comun di Codroip, insiemit a chel dal “San Simonut” pai fruts e fantats des scuelis.
Il premi, in memorie dal Inz. Agnul M. Pittana, tai ultims doi agns al è stât vinçût di Franco Marchetta (l’an passât cul romanç “U-”).
Vie pe ultime edizion, Carlo Tolazzi, president de jurie, al è someât plui content dai ultins agns, cuant che al fo protagonist di plui di une “tirade” cuintri i lavôrs presentâts. Chê dal 2012, di fat, e je stade une edizion dal premi cuntun alt numar di oparis presentadis, ben cutuardis, dulà che si è viodude ancje une buine partecipazion di feminis cun cuatri autoris. Il nivel al è stât preseabil cun almancul sîs-siet oparis che si podevin definî romançs complets.
Se i autôrs a àn dimostrât di reagjî a lis critichis cul lavôr, no cussì e à fat la struture dal Premi che, vie pal dibatit che si veve screât pes critichis di Tolazzi, e jere stade metude in dubi. La formule, di fat, e reste simpri chê. Si veve fevelât di vierzile a lis oparis editis dentri dal an, cussì di deventâ il ricognossiment pal vêr e propri “libri dal an in lenghe furlane” (scrivi un romanç di pueste al siere tantis pussibilitâts) o vierzile ai romançs grafics (contis lungjis a fumuts cu la dignitât dal romanç) o a racueltis ben struturadis di contis curtis (une tipiche tradizion, ancje siore, dal Friûl).
Insumis, come che al sucêt dispès in Friûl, il popul (in chest câs “artistic”) al cîr di risolvi i problemis tirantsi sù lis maniis rispuindint cul lavôr a la sorditât dai sorestans.
No cate chestis cuistions ancjemò in pîts, starìn a viodi chest an se la leterature furlane e je daûr a saltâ fûr di chê che Tolazzi al definì “prognosi risiervade”. ❚
✒ Redazion