Tancj ancje chest an i musiciscj di chenti
Carniarmonie e dediche atenzions grandis pai artiscj furlans, pe lenghe furlane e pes musichis nassudis e che a nassin in Friûl. Il mês di Lui, in chest sens, al à vût in program un biel progjet cul titul: “Barlums. Canti d’inchiostro”, realizât dal grup Braul che al à publicât di pôc un disc cu la etichete furlane Folkest Dischi. A Dimpeç, come secont event tal calendari di Carniarmonie, chescj sîs furlans a àn sunât e cjantât une schirie di composizions origjinâls cjapant ispirazion dal romanç “Il formaggio e i vermi” di Ginzburg e di mîts e storiis furlanis. Altri esempli al è stât il conciert a Preon cun protagonistis cetant preseadis la arpiste Emanuela Battigelli di Glemone e la pianiste e compositore Luisa Valeria Carpignano che e vîf a Udin in pratiche di simpri. Si son esibîts ancje il grup classic formât di zovins furlans cuntun non forest, ven a stâi i “Ozone Sea Trio”, che al à sunât a Divilin, la Academie di Arcs Arrigoni di San Vît dal Tiliment che e je stade protagoniste a Soclêf insiemi al trombetist spagnûl Vincent Campos, e il Côr dal Friûl – Vignesie Julie che si è esibît inte plêf di Davâr.
◆ Lant a dâ un cuc ai artiscj furlans presints intal calendari di Avost di Carniarmonie, vinars ai 2 il grup formât di Alessio e Giuliano Velliscig e des vôs di Valerio e Michela Marchi, ducj furlans, al tignarà un spetacul dedicât ae storie di Buffalo Bill. Il dì dopo, a Vile di Verzegnis, i doi furlans Marco Bianchi aes ghitaris e U.T. Ghandi ae batarie, a sunaran intun conciert cul titul “Dialogos”. Un altri doi furlan, fat dai fradis Anna e Giovanni Molaro, al sarà ospit ai 8 di Avost a Dilignidis di Soclêf. Il cetant cognossût pianist e compositôr di Gradiscje di Sedean, Glauco Venier, insiemi a Mirko Cisilino, Alessio Zoratto e Marco D’Orlando, furlans ancje lôr, al sarà a sunâ a Malborghet Valbrune. De nestre regjon a son lis bands “The 1000 Streets’ Orchestra” e “Lumen Harmonicum” che si esibiran ai 16 di Avost a For di Avoltri, e ancje la “Tomat Band” che e sunarà a Tarvis ai 18 di Avost.
◆ E no son ducj, altris nons de nestre int si puedin lei inte largje programazion di Carniarmonie, che di simpri e à lis orelis spiçadis par dâ valôr ai tancj musiciscj e compositôrs di chenti. No dome ae int che e sune, ma ancje ai struments musicâi che a son in Cjargne, in particolâr ai orghins che a vegnin valorizâts intal progjet “Dopomesse”. Si da valôr a ents e associazions che il festival ur da une man inserint lis lôr iniziativis dentri dal so cartelon. Al merete nomenâlis dutis: Fvg Orchestra, Ert, Css, Nei Suoni dei Luoghi, Anciuti Music Festival, Simularte, Risonanze Festival, Vicino/lontano mont, Musei Tarvisio e Melius Srl. No par ultime la iniziative “La lungje gnot des plêfs in Cjargne” che e propon, ai 24 e 25 di Avost, dôs zornadis di musiche corâl e degustazions di plats tipics dal Friûl, par un totâl di cinc apontaments intes plêfs di: Sante Marie di là de Bût di Tumieç, San Martin di Verzegnis, Sante Marie Madalene di Divilin, Sant Ilari e Tazian di Denemonç e Sante Marie Anunziade di Castoie di Soclêf. Ospits côrs de Slovenie, di Triest, de Carinzie e, clâr, dal Friûl. ❚
