AI 32 DI MAI. Un princip parsore dal mus

Ducj i popui a àn i lôr erois, e i gjenitôrs a contin lis lôr storiis ai fruts cuant che a son piçui, cussì i fruts a vegnin sù cun chei valôrs e a imparin a jessi come lôr, a cjapin lis lôr cualitâts e lis lôr virtûts.
E duncje ancje a mi, di piçule, mi contavin lis storiis di un eroi furlan. Un soldât? No. Un politic rivoluzionari? Nancje. Un princip parsore di un cjaval? Figurìnsi.
No: l’eroi dai furlans, o almancul di chei tor di Codroip, al lave ator cuntun mus e al vendeve zeis. Jacum dai Zeis, lu clamavin.
A Codroip a àn ancje tirât sù une statue, di Jacum e dal mus.
E fin chi dut normâl: i furlans a son int modeste, di sostance, che no va daûr al lustri, ae popolaritât o a titui di nobiltât. Nol è nuie di maraveâsi se si sielzin tant che eroi un cence «pedigree». Ce che  mi à simpri stranît di cheste storie, e je la reson dal so jessi un eroi pai furlans: Jacum dai Zeis al coionave ducj (specialmentri chei cul pedigree, al è clâr). Une robe che nissun furlan al fasarès mai, no par sotanisim – intindìnsi – ma dome par vie che imbroiâ no je robe pai furlans, sino mats?
Ma Jacum dai Zeis al podeve fâlu: al jere un eroi, lui. Al faseve scomessis cul Cont Manin su cui che al coreve di plui lant a Udin, e cuant che al rivave a Udin trê oris dopo dal Cont, i diseve «O ai  corût trê oris plui di te! O ai vint jo!». O pûr si sentave suntune coce, fasint crodi di jessi daûr a clucî un ûf di mus. Robis cussì si ’nt contin un grum su di lui. Ducj chei che a vivin tor di Codroip a cognossin cualchi storie, e cuissà se a son veris o no. Indi varà fatis dôs o trê, di chês che a contin, e chês altris lis varan zontadis dopo, par fâlu sameâ ancjemò plui svelt e scaltri di ce che al jere. Forsi tantis lis àn fatis chei altris, e par no someâ masse imbroions, lis contavis come se lis ves fatis Jacum dai Zeis. Lui al podeve: al jere un eroi, lui.
O forsit Jacum dai Zeis al rapresente une figure catartiche, liberatorie di ducj i desideris di rife dai  furlans, dai istints che no si puedin contâ, de rabie che però e va tignude cidine par no lâ cuintri de leç. E par chest al coventave un om scaltri, un tic imbroion e cuntun pocje di sflacje intor.
Stramps, i furlans. A son ducj braurôs di ce che a son e dopo a cjalin cun amirazion un che al samee un triestin. Ma Jacum dai Zeis al à podût fâ ancje chest. Al jere un eroi, lui.
BETE DI SPERE