AI 32 DI MAI. Ducj a durmî, che e rive Sante Lussie. O Sant Nicolau?

La basse, la Cjargne, di ca e di là da la aghe: no si pues dî di sigûr che il Friûl al sedi une tiere dute compagne. A dividinus, lis pronunciis diferentis de marilenghe, i mûts diferents di fâ il frico, i nons dal “pignarûl” (par me si clame fogoron, par esempli), e fintremai i personaçs che a puartin i regâi ai fruts tor Nadâl.
A Sedean o jerin fortunâts, parcè che li di noaltris a passavin in trê: Sante Luzie al 13 di Dicembar, Barbe Nadâl ai 25 e la Befane ai 6 di Zenâr. Barbe Nadâl al jere il plui bulo, e ai 25 al rivave il regâl plui grues, ma ancje chel di Sante Luzie nol jere mâl. Nissun al à mai rivât a capî cemût che e jere fate, cheste Sante Luzie: no veve un vistît cognossibil tant che Barbe Nadâl e di sigûr no sameave une strie come la befane, ma a noaltris nus bastave che e puartàs i regâi, no nus coventave cognossile te muse.
La befane, invezit, e jere propite la plui disgraciade: brute come la fam, e e puartave dome doi bombons e un pocje di cjocolate che, dopo un mês passât a mangjâ mandolâts, panetons e pandoros no fasevin plui nancje masse gole.
Ma migo ducj i fruts furlans a vevin il “trident”! In cualchi paîs, par esempli, Sante Luzie no le cognossevin, e tal so puest a vevin Sant Nicolau, ai 6 di Dicembar. Sì, propite Sant Nicolau, o sei Santa Claus, o sei Barbe Nadâl. Mascarât tal non, ma simpri lui: di fat, dispès, al jere ancje vistût compagn: dut di ros, cu la barbe blancje (no si sa se la tradizion e diseve propite cussì o se al jere dome plui facil cjatâ in vendite un costum di Barbe Nadâl e doprâ diretementri chel). Une usance che no soi mai rivade a capî, e che secont me e meteve dome un grum di confusion tal cjâf dai fruts. Cemût fasevino a no domandâsi cemût mai che chel siôr vistît di ros al passàs li di lôr ai sîs e li di chei altris ai 25?
O pensavino forsit che Barbe Nadâl, a fuarce di fâ tancj regâi a ducj, al fos deventât puar e al ves vût bisugne di fâsi passâ i vistîts doprâts di Sant Nicolau?
E a Nadâl, ce fasevino i fruts che a vevin vût bielzà Sant Nicolau? A cualchidun si diseve “a Nadâl al rive Gjesù Bambin” (sì, ma cemût fasevial Gjesù bambin a tirâsi sù dal presepi e a lâ atôr pal mont a puartâ i regâi?). Chei altris si tacavin.
Un biel pastrocj! Une vore miôr vê vude Sante Luzie. E sarà ancje stade vuarbe, come che e conte la tradizion, ma e veve une buine smicje par puartâ i pacuts!
BETE DI SPERE