Sfuei Mensîl Furlan Indipendent
Archivi de Patrie

Achì Milan: mancul agregâts ma plui cussients

............

Ise gambiade e trop la emigrazion furlane dentri de Italie? Viodìn la situazion di Milan, tamesade traviers la opinion di personis di divierse etât.
PIERO MONASSI_, medaist (viôt La Patrie di Mai, ndr), al è stât president dal Fogolâr Furlan di Milan par doi mandâts, dal 1994 al 2000. I vin domandât cemût che al è gambiât il mût di agregâsi dai furlans. «Tancj si cjatin inmò tai fogolârs, la Lombardie e je avonde ative par chest cont. No son tancj i zovins. Chei nassûts chenti no sintin tant il leam cul Friûl come une volte. Po dopo e je mancjade cualchi iniziative juste par coinvolziju, lôr e chei che ancjemò a rivin dal Friûl». Monassi al spere in un gambiament. «Cumò cu la gnove dirigjenze dal Ent Friûl tal Mont mi pâr che si à intenzion di proponi alc di gnûf. A Pontebe, se o pues, o larai cun tant gust (de cunvigne o fevelìn a pagjine 6, ndr)».
MARCO MARCON_ 35 agns, al è il president dal Fogolâr di Bollate. Al è nassût e al lavore a Milan. Par lui tant al è gambiât parcè che une volte i emigrâts «si clamavin jenfri di lôr de stesse zone – a Bollate par esempli o vin une gruesse comunitât di Pinçan e dongje – duncje a ‘nd jere plui unitât. Po dopo si cjatavin sul lavôr che, forsit par vie che al jere umil – come lâ in fabriche–, al tignive dongje di plui come che cumò a fasin comunitâts gnovis e puaris compagn come i rus». Pre Checo al diseve che un popul nol mûr cuant che al à fan ma cuant che al è masse passût, i disìn a Marco. «Po stâi, sigûr! Cumò al è il fatôr des distancis anuladis, magari propit parcè che o sin plui siôrs e si podìn permetisi di tornâ facilmentri in Patrie. Vuê al è dal dut pussibil – e al sucêt – che un al lavori a Milan e al vedi la morose o adiriture famee in Friûl. Par assurt a voltis si cree il mecanisim psicologjic che un lu à talmentri a puartade di man che nol va mai e no si interesse che si mantegni vivarôs: tant al è!»
DANIELE REVELANT_ 36 agns, al è nassût e al lavore a Milan ma al è simpri stât leât ae Patrie – al è un dai fondatôrs de associazion FAF–Fantats Furlans – e la femine e la fie lis à in Friûl. «Cuant che o jeri plui zovin un element di agregazion al jere lâ in trasfierte a viodi l’Udin, po dopo o ai frecuentât un pôc il Fogolâr ma lis iniziativis inmaneadis no mi interessavin cuissà ce. Robis come gjite a schiâ». A ‘nd è cualchi difarence tai ultins agns: «Vint la famee in Friûl jo o viazi dispès in tren e o incuintri e o sint i discors di tancj furlans. Par me e je plui cussience rispiet a une volte, massime jenfri i zovins: tancj di plui a tifin Udin – par dî une robe stupide – o a fasin discors plui centrâts suntune sorte di “braure” furlane». E mancje però la agregazion. «Une volte rivâts in citât i furlans no si cjatin jenfri di lôr parcè che no sintin la dibisugne. A Milan si gjoldin la tante robe che e à di ufrî la citât, come divertiment e ancje come lavôr».
SARA_ Une des zovinis furlanis che a son a stâ a Milan e je Sara De Cecco di Glemone, 26 agns, studente al Politecnic. «Di furlans in citât e ae Universitât no a ‘nd ai cognossûts tancj. Almancul bande Udin. A son plui chei dal pordenonês». Ise cualchi ocasion di agregazion? «No mi pâr di sintî tant ator cheste esigjence, forsit di chescj timps si fasìn di plui i nestris fats. Jo par dî la veretât une volte o soi passade in sede dal Fogolâr ma o ai cjatât sierât. Dopo o ai pensât che no varès vût timp di stâi daûr ancje a chel e no ai insistût». Pensistu di restâ a vore a Milan? Cemût ti cjatistu? «Al sarà dificil cjatâ lavôr in Friûl viodût che o fâs la specializazion in inzegneristiche spaziâl. A Milan aromai mi soi usade a cjatâ dut dongje: negozis, concierts, iniziativis. No che no sedin in Friûl ma tu âs di fâ plui strade. E dopo cualchi volte la mentalitât cuant che o torni cjase mi samee un tic plui sierade di ca, ma probabilmentri al dipent di cui che ti capite di frecuentâ, come dapardut: il gno ambient achì al è chel universitari».
Dree Venier

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +