Sfuei Mensîl Furlan Indipendent
Archivi de Patrie

A TU PAR TU. Ce che a disaressin dal Friûl di vuê, chei che a àn fat la sô storie. Confession agnostiche (pre Toni Beline)

............

Pre Toni Beline intun dissen di Gianni Di Lena
Pre Toni Beline intun dissen di Gianni Di Lena

Pre  Toni Beline (Vençon 1941 – Visepente 2007), al è stât un dai plui libars pensadôrs che il Friûl al vedi mai vût. Inteletuâl di gran fate, polemist, scritôr, poete, gjornalist, furlanist convint e tradutôr in lenghe furlane, daspò de cetant dure, dibatude e dolorose esperience dal ‘Seminari – che e segnarà in maniere fuarte la sô vision de Glesie e dal Mont – al à tacât a dì messe tal 1965. Al à pandût il so savê, la sô profonde umanitât e il so spirt critic in cetantis glesiis, tant che a Codroip, a Val, a Rualp e a Visepente, là che la muart lu à puartât vie un vincjetrê di Avrîl, sul cricâ de Vierte, intant che al cjaminave pe strade: metafore di une esistence dedicade al popul, intindût tant che “la int”, fûr di ogni cubie e ben lontan dal Palaç, là che la liturgjie e devente burocrazie, votât tal sens di une imitazion di Crist che no podeve mai fâ di mancul di tignî presint l’om, cun dute la sô miserie grivie e la sô bielece sflandorose. Se la sô opare principâl e la sô plui grande fadie in fat di studi, dedizion e sfuarç linguistic e je considerade, a reson, la grande traduzion in lenghe furlane de Bibie, condividude in colaborazion cun Pre Checo Placerean, la sô “Fabriche dai Predis”, là che al descrîf cence censure il clime scjafoiant dal ‘Seminari Arcivescovîl di Udin, e à fat il scjas plui grant, tant che la Curie no à permetût l’Imprimatur. Pandude in forme clandestine, la opare e je deventade un libri cetant popolâr, in dì vuê un dai plui lets in Friûl, ispirant ancje plui di cualchi rapresentazion seniche e teatrâl. Grande vôs di Glesie Furlane, che e à curade une preziose golaine dai siei scrits, pre Toni al à pandût il so pinsîr in libris di grandissime profonditât teologjiche e filosofiche. Lis predicjis e lis letaris, publicadis di Glesie Furlane, a restin forsit l’esempli plui biel di scletece e di stîl dal lôr autôr.
……………………………………..
Cuant che mi met in zenoglon sul scjalinut di len, il confessionâl al tache a criçâ di dutis lis bandis. Tant che mi pâr che si fracassi di chi a un moment. “Miôr che o ledin a confessâsi cjaminant”, mi dîs la vôs che e ven fûr dal gabiot e, vierte la tende, il confessôr al cuche par rindisi cont di cui che al à denant. “Pre Toni, par me al larès ancje miôr. No soi propite chi par confessâmi. Che a son agnorums che no pratichi, anzit o clopi su pe strade dal dubi, e no savarès nancje di ce bande scomençâ”. Chest predi assetic, cui voi profonts, mi cjale come che o fos un puar biât, e cun ogni probabilitât al à ancje reson: “Lis olmis di Diu a son misteriosis. E il crodi al è fadie. Viodistu, la Fede no je mighe un lat in polvar, un omogjeneizât di supâ. A son daûr a fâle deventâ une panade lamie, chei curiâi che si preocupin dome di une liturgjie simpri plui puare di anime. Ma i siei savôrs, chei vêrs, i siei profums, a vadin cerçâts cun pazience. Crodimi, ti vûl une vite par coltivâle. Tacant de contemplazion de nature. De sô bielece”. O jessìn fûr dal Domo di Vençon e o resti stranît. L’Autun al somee che i dedi reson, cui siei colôrs cussì sclarîts tal frêt de sere. “Dentri a cjantin jespui. Fûr il mont al cjante Diu”. O ai simpri pensât che pre Toni al fos un mistic. Un di chei predicjadôrs medievâi che no si contentavin de contemplazion o dal studi, ma a sintivin fuarte la bisugne di scrivi letaris, di criticâ il podê, crudêl e inflacjît, di pandi il verbum de Veretât, simpri. E la fuarce di cheste considerazion mi sburte a fâi une domande fuarte, secje, che di un pôc mi stice la cussience: “Di tant che o vês scrit, mi pâr di cjatâ la vuestre anime soredut tes letaris. Là che si pues gjavâ fûr il vuestri pinsîr plui fresc, imediât, tes relazions cun inteletuâi, cui scritôrs, politics, vescui, altris predis, int di ogni dì. Al nas il ritrat di un Friûl, dissegnât di anade in anade, cu la sô bielece ma ancje cui siei tancj intrics, lis contradizions, i siei erôrs. No mi pâr che in dì di vuê e sedi une vôs compagne ae sô, buine di interpretâ, di aprofondî la societât de nestre Patrie, e ancje cul coraç di patafâle cuant che a son robis che no vadin ben, e che no funzionin. Ce staial sucedint al nestri Friûl?”. L’aiarin al è frescot, e il scûr al sbrisse ben planc jù pe mont. Dome la ponte di aur dal tor e robe l’ultin lamp di soreli, e e lûs come che e fos un fâr piât dongje dal Tiliment. “Bon, il sfuei là che tu scrivis ancje tu e o ai scrit ancje jo, ven a stâi La Patrie, mi par avonde pevarin. Ma tu âs reson tu. No viôt tancj altris presidis di pinsîr libar ator pal Friûl. Gjave cualchi rassegne culturâl tignude sù cu la passion di chei che i crodin, cence spietâsi nuie di nissun. Come chei di Vilecjaze, che ogni an ti inventin percors gnûfs, di Invier come di Istât. O la Radio libare dai furlans, che e prove, che e misclice, che e sperimente. E cjale soredut i zovins, la vere grande sperance e la scomesse plui riscjose. Il vêr probleme al è che no mi pâr che e esisti une scuele di pinsîr critic par furlan. Alc al sta vignint fûr in politiche, sul cont de autonomie. Un laboratori che mi plâs, no dome pai contignûts, dal sigûr in linie cun ce che o ai simpri sostignût. Ma ancje parcè che finalmentri al è trasversâl, al tire fûr il sens profont di une apartignince, cence colôrs e ideologjie. E in plui, mi plasin lis robis che a nassin di une esigjence di studi e di aprofondiment. E dut chest mi sta ben. Ma il rest? Mi pâr che il sociâl al resti cence vôs e cence rapresentance. Par no fevelâ po de culture. Pussibil che dut al vadi ben? Baste no scrivi une recension tristute, tignîsi in buine cul siôr assessôr, no impaçâsi di nuie e cun nissun. Ognidun cul cjâf bas sul so agâr. E magari barufâ par zelosie, o parcè che te graduatorie dai finanziaments no si è intune posizion privilegjade. Bisugnarès fondâ une culture che no sedi sierve di nissune cjadree, di nissun paron. Che e fondi la cualitât no sui becins che i vegnin di cualchi amì in Provincie o in Regjon, ma suntun spirt san, su la voie di cirî une leture dal mont simpri gnove, mai strache di fâ domandis e soredut mai stufe di cirî une rispueste”. Chei dal jespui a àn cuasi concludût. Si sint il cjant par furlan, cussì antîc e cussì fuart che ancje lis pieris dal Domo a parin gjoldi di tante bielece. “Pre Toni, e la assoluzion?”. Dongje, il Tiliment al pâr che al cjanti ancje lui. ❚
Angelo Floramo

L'editoriâl / Macroregjons, une oportunitât di racuei

Alessandro Ambrosino - Graduate Institute, Gjinevre
Lis strategjiis macroregjonâls a son la ultime “invenzion” UE par favorî la cooperazion teritoriâl. Trê di cuatri si incrosin in Friûl Intai ultins agns, la Union Europeane si è sfuarçade in maniere vigorose di vignî dongje di plui ai citadins e – su la fonde di chest cambi di rote – e à ricognossût une […] lei di plui +

Il numar in edicule / Jugn 2022

Dree Venier
Jugn 2022 – L’EDITORIÂL. La multiculturalitât e valorize il grant e il piçul / (L)INT AUTONOMISTE. Il pericul centralist al è tal Dna dai partîts talians / PAGJINE 2 – LA STORIE. Di Udin a Pesariis par promovi la mont e i prodots furlans / INT DI CJARGNE. Aziende Agricule Rovis Sabrina di Davài di […] lei di plui +