Partìn des buinis gnovis: al Ministeri de Istruzion talian si son finalmentri inacuarts che in Friûl e esist une scuele plurilengâl. Il sorestant dal Guvier Draghi delegât al mont de scuele, Patrizio Bianchi, intun dai siei ultins ats al à firmât un decret che al autorize di intivâ un “curricolo plurilingue verticale” al Istitût “Ingeborg Bachmann” di Tarvis. Di ce si tratial? Di une sperimentazion uniche in Italie – e forsit in Europe – dulà che intai ples dal Istitût si cjatarà maniere di dâ competence ai arlêfs in cinc lenghis: une e je l’inglês, ma chês altris cuatri a son chês dal teritori (talian, todesc, sloven e furlan). Il program al previôt che cheste modalitât e pues jessi doprade des scuelutis pe infanzie fintremai al Liceu.
◆ Grande gjonde des autoritâts; in particolâr la assessore de Regjon Alessia Rosolen e pant che “La atenzion vude dal Ministri Bianchi e mostre la validitât de propueste che o vin fat al Guvier e la nestre vision de scuele tant che un imprest bon di dâ rispuestis no standardizadis, ma peadis aes domandis dal teritori e ae sô specialitât”. “E somee une part minime de norme di atuazion dal titul V de Costituzion su la regjonalizazion dal sisteme de scuele in Friûl-Vignesie Julie, ma e mostre – e sclarìs la assessore – la cualitât dai nestris percors educatîfs e formatîfs, e la fuarce des lenghis come veicul di incressite par judâ a imparâ di plui e miôr”.
◆ Si zonte la diretore dal Ufici Scolastic Regjonâl Daniela Beltrame, che e pant che “la cognossince des lenghis forestis (e dal furlan no? Ndr) e rapresente un dai fatôrs di ocupabilitât plui grancj pai zovins che a jessin fûr de scuele e de universitât. Cu la aprovazion de sperimentazion si ricognòs la impuartance de autonomie scolastiche, stant che a Tarvis chest percors si è inviât za fa vincj agns”.
◆ La iniziative e nas di fat dai comuns di Tarvis e Malborghet, cjapant cjapât sù la domande des fameis e cjatant la disponibilitât dai insegnants. In particolâr, i assessôrs Barbara Lagger e Alberto Busettini intal 2017 a àn metût in pîts une comission sientifiche internazionâl par meti jù un progjet didatic che 5 agns dopo al à vût il bon acet dal Guvier.
◆ Il pont al è propit chest. Parcè àno di coventâ desenis di agns par vê il permès di dâ tutele a une identitât secolâr, che di 1000 agns e passe e fâs di chest teritori la crosere dulà che si zontin lis civiltâts (latine, gjermaniche e slave) che a àn fate la Europe? ❚
A Tarvis il Stât al autorize un gnûf model di educazion plurilengâl
