Sfuei Mensîl Furlan Indipendent
Archivi de Patrie

A lezion di Friûl cun D’Aronco: la racuelte dai siei editoriâi dai ultims agns

............

«Che a Rome no savedin ce che al è il Friûl, pazience. Ma no lu san nancje ben cetancj furlans. Duncje, ogni tant, covente spiegâural».
Ve ca, “curtis e che si tocjin”: ce che al scrîf Gianfranco D’Aronco vie pal libri Un contado chiamato Friuli, al è il struc e il sens di chest volum.
Il libri al tire dongje i articui publicâts di D’Aronco daspò dal 2008, cuasi ducj su Il Messaggero Veneto, ma nol mancje il nestri mensîl. Chei jessûts prime a jerin za stâts publicâts intal volum Il Friuli a mezzadria.
Cui isal il professôr Gianfranco D’Aronco, che su chestis pagjinis nol varès bisugne di presentazion, nus al dîs pre Toni Beline intune des citazions te cuviertute dal libri: «Al è la anime, une anime cjamade di agns, scanade di bataiis sostignudis in solitarie militance, malapaiade de masse indiference e incomprensions, ma mai domade. Mi riferìs al prof. G. D’Aronco, che no si rassegne, no si rint, nol lasse passâ ocasion par tornâ fûr cu lis sôs propuestis che o scugnìn clamâlis profetichis».
Burît fûr par La Nuova Base, la publicazion e je stade realizade in gracie de colaborazion di Provincie di Udin, Fondazion Crup e Upi (Union des Provinciis dal F-VJ). I argoments tratâts ju spieghe ben propit il president de Provincie di Udin Pieri Fontanini te prefazion: «La istituzion de Universitât dal Friûl e la sô rilevance pal disvilup dal teritori, la difese cence padin de marilenghe, il riclam al Stât patriarcjâl, esempli di autoguvier di avanvuardie, il dualisim Friûl-Triest cu la arude prevalence dal cjâf lûc julian tant che conferme di un decentrament che nol è mai stât fat e che anzit al ven fiscât une volte par dutis cuntune leç di riordin dai ents locâi che al cope lis Provinciis e al fruçone il teritori».
Leint chescj articui no cjatìn dome il pinsîr dal autôr su la atualitât, ma si torne a passâ dute la storie dal Friûl, in gracie des citazions rafinadis, precisis e puntuâls dal professôr: un esercizi che nus coventarès cetant par savê cemût frontâ il futûr. Dome un esempli, in prionte dal libri, il struc gjavât fûr di Udin: mil agns tal cûr dal Friûl di Giancarlo Menis, dulà che si conte di «Udin cjâf lûc mancjât de Regjon autonome». Li che si puedin lei dutis lis miseriis de nestre classe politiche regjonâl, cun chei (furlanons) che a disevin che al jere impussibil separâ il Friûl dal Venit, che a saressin vignudis fûr dome disgraciis, che il Friûl nol podeve stâ di bessôl. No us visial cualchi discors che si sint cumò?
Il libri, purtrop, si siere cuntun intent di D’Aronco che al lasse malapaiâts: «Par cont dal sot scrit, cumò al à chê di molâ la brute abitudin di dî ce che al pense e massime di scrivilu e tornâ a scrivilu sui gjornâi: al à za dit chel pôc che al saveve, e al varès dome di ripetisi». Sperìn che no sedi vere, che la sô vôs nus mancjarès masse.
Ma intant, leiêt chest libri. Par savê. ❚
✒ D.V.

Libris simpri bogns / Emilio Nardini, “Par vivi”, Udin, 1921

Laurin Zuan Nardin
“Apene finidis di lei lis poesiis dal cont Ermes, il dotôr Cesare, fra i batimans dal public, al si ritire daùr l’uniche quinte preparade a zampe dal… palc scenic. Ma, pal bessologo, che il devi recità il brâf atôr di san Denel, Giovanin Tombe, ‘e ocòr une scene, e il dotôr Cesare la proviot cussì:…” […] lei di plui +

Interviste / Numb il cjan scjaladôr (e il so paron Thomas)

Dree Venier
Di un probleme ae çate al record in mont: interviste cun Thomas Colussa, che cul so Numb al sta pontant al record di altece lant sul Mont Blanc O vevi za intervistât Thomas Colussa, 40 agns, un pâr di agns indaûr. In chê volte al jere un “furlan a Milan” e al faseve il personal […] lei di plui +

L’EDITORIÂL / La identitât e ven dai zovins

Walter Tomada
Une zornade di incuintri pai Conseis dai Fantats Al à fat scjas il senatôr Roberto Menia che al à declarât di volê gjavâ il furlan de scuele e dal ûs public. Al jere di un pieç che nissun rapresentant des istituzions al pandeve clâr di volê scancelâ lis normis di tutele, ma salacor a son […] lei di plui +