Sfuei Mensîl Furlan Indipendent
Archivi de Patrie

________________

............

Vive il 3 di Avrîl!
In barbe a cui
che nus viôt sotans

Il pericul de retoriche al è simpri fuart cuant che a son celebrazions uficiâls.
Lu è ancjemò di plui cuant che chestis a son cussì raris che al somee cuasi di vê di condensâ, intun sôl moment, dut ce che al ven dineât dilunc dal rest dal an. Cussì al podarès sucedi che ancje in ocasion di chest 3 di Avrîl dal 2019, che al ricuarde la nassite dal Patriarcjât di Aquilee, si fasìn cjapâ la man de enfasi, di andis nostalgjichis o di peraulis vueidis de bande di chês istituzions presintis sul palc uficiâl, cuasi costretis par leç. Atenzion a no colâ nancje intune disposizion contrarie, o sedi a no calcolâ la lôr presince tant che il risultât di une pression popolâr, di un sintiment simpri plui condividût e difondût che al à puartât ae uficializazion de nestre fieste nazionâl. Al è un pôc come pal furlan a scuele: o podìn criticâ cemût che e je aplicade la leç che e fisse la presince intes aulis, ma no vin mai di dismenteâsi di pretindi che cheste e sedi rispietade e che se e esist al è dome in graciis de volontât des fameis furlanis.
✽✽ Se il to Comun, duncje, nol espon la bandiere cu la acuile patriarchine, la bandiere che e identifiche la nestre int, al è just protestâ e pretindi di viodile svintulâ. Denunziait chei sindics che a van cuintri
de leç, no stait a rassegnâsi ae idee che si trate dome di un toc di stofe: al è il simbul de nestre anime coletive chel che al ven dineât.
Cjalait che, cundut dai sfuarçs, des fadiis di tancj furlans, la idee prevalente inte classe dirigjente di cheste regjon e je che dut chest al sedi dome folclôr, une copie di une cualsisedi rievocazion storiche par turiscj. E je une concezion presinte no dome in cuasi ducj i politics, ma ancje tra i imprenditôrs, i professioniscj e fintremai in cualchi strât de popolazion, in chei teritoris dulà che chê propagande italianiste che tant e martiele e à fat plui vitimis.
✽✽ Po dopo, denant di batudis tant che «O volês tornâ al feudalisim», no stin a fâ i interlocutôrs simpatics, ma rispuindìn cun fermece al stupit di turni, domandant prin di dut ce che al cognòs pardabon de storie dal Patriarcjât, de sô forme istituzionâl avanzade, di chê democrazie parlamentâr uniche inte Europe dal timp, dal so rûl pardabon di prin plan intal Vecjo Continent, des strategjiis metudis in at pe sô licuidazion.
Ma a son robis che voaltris letôrs de Patrie o cognossês ben. Ve che alore atualizâ lis nestris ciertecis, rinfuarçâ il spirt identitari che lis caraterize, al devente l’element principâl intes celebrazions dal 2019.
✽✽ Celebrazions che si tegnin a Gurize, in chest moment paradòs e paradigme de cuistion furlane, cu la progjetade anession de sô ex provincie a chê di Triest. Une prove che e jentre inte logjiche di un gnûf centralisim regjonâl basât su la ipotesi di un unic grant pôl di disvilup dal puart julian. La riorganizazion teritoriâl, l’asset e la funzion dai ents locâi, tacant dai Comuns, e devente la sfide che o vin denant. Di frontâ cence prejudizis, ma cun ancjetancj ponts fers. I palets che nô o vin di meti, a tocjin prin di dut la vision strategjiche dal rûl di cheste Regjon dentri de Europe, su la fonde dai cambiaments profonts che a son daûr a sucedi, cul difondisi di un nazionalisim statalist, puartadôr di gnovis prepotencis bande i popui “diviers” par storie, lenghe e culture. No dome. Se o cjalìn bande il futûr, o vin di interogâsi se ancjemò al esistarà il Friûl cemût che vuê lu cognossìn, devant di un clime che in curt al cambie lis cundizions stessis di vite, economichis e sociâls.
Tornâ al spirt cristian e universâl de Glesie aquileiese, pensâ di gnûf ae sô plui alte forme di realizazion istituzionâl, al devente vuê un stimul a meti il nestri popul al centri di un procès di rinovament e rinassite.
✽✽ Se o sarìn convints che chest no dome al sedi just, ma dovût a favôr des gnovis gjenerazions, celebrâ chest 3 di Avrîl nol sarà un at retoric, ma une faliscje di futûr. ❚
Dree Valcic

L’EDITORIÂL / Jù lis mans dal Tiliment

Walter Tomada
Traviersis, cassis di espansion, puints e viadots autostradâi, potenziament dal idroeletric: al mancje dome di metisi a sgjavâ cu lis trivelis par cirî gas o petroli! Ma parcè il Tiliment, che tancj studiôs a stimin jessi l’ultin flum salvadi de Europe, isal sot di dutis chestis menacis, invezit di jessi tutelât e protet cemût che […] lei di plui +

(L)Int Autonomiste / Cui aial pôre de “Cuistion furlane”?

Dree Valcic
✽✽ No ven plui nomenade, sparide dai radars dal dibatiment politic e culturâl. Di “Cuistion furlane” no si ’nt fevele plui. Di cent agns incà e esist chê meridionâl, cjare a Gramsci, e su chê miârs e miârs di students a àn fat tesis di lauree, a son stadis fatis ancjetantis cunvignis, ogjet di ogni […] lei di plui +

L’EDITORIÂL / La “bufule meloniane” e la autonomie inte glacere

Walter Tomada
“Si sin indurmidîts furlans, si sin sveâts melonians”: cun chestis peraulis un cjâr amì al à strent intun sproc sintetic il sens des elezions politichis che pardut a àn viodût a vinci fûr par fûr ancje chenti Fratelli d’Italia, il partît di Giorgia Meloni. Di storic i ai rispuindût che 100 agns fa une dì […] lei di plui +

La anteprime / Cors di furlan par gjornaliscj: consegnâts i atestâts

Redazion
Ai 27 di Setembar, te sede di Udin de Regjon Autonome Friûl-Vignesie Julie, a son stâts consegnâts i atestâts ai vincj gjornaliscj che a àn partecipât al prin cors di lenghe furlane inmaneât de ARLeF – Agjenzie Regjonâl pe Lenghe Furlane e dal Ordin regjonâl dai gjornaliscj. La consegne dal document ai professioniscj de comunicazion […] lei di plui +