“La Patrie” no je dome un gjornâl, e je une comunitât. Lu conferme la biele partecipazion di une vore di int ai incuintris “sot dal tei” che chest Istât ator pal Friûl e sta tirant dongje interes e voie di discuti lis prospetivis dal nestri avignì. Come che a fasevin i nestris vons al timp des viciniis, dantsi dongje tai moments dificii par condividi ideis, poris e mieçs par la indevant, cussì i letôrs, i aministradôrs e la int plui varie nus àn rispuindût e a àn sielzût di pandinus dute la lôr braure di jessi furlans ma ancje i dubiis e lis incognitis su ce che al vignarà. Graziis di cûr a ducj voaltris e ai Comuns che nus àn dat acet: di Cjarlins a Cormons, di Merêt a Cjopris e Viscon, di Cuar di Rosacis a Tumieç, di Glemone a Tavagnà, di Pavie a Spilimberc.
◆ O continuarìn a cjatâsi fintremai a Setembar ancje parcè che i fats nus mostrin che l’esistence stesse dal Friûl e dai furlans par tancj no je cussì clare. Lu dimostre il gnûf logo “Io sono FVG” che la Regjon e à mandât indevant e che Dree Valcic al comente chi a flanc. No varessin mai pensât di deventâ une agjenzie di marketing ma chi parsore us fasìn viodi il logo che Dree Venier al à prontât tic e tac in rispueste ae porcarie negazioniste (paiade cun bêçs publics) che e innee l’identitât dal Friûl (e ancje di Triest) intun magma indiferenziât cence sens e cence storie. Il nestri logo al à vudis centenârs di condivisions: chel de Regjon dome polemichis.
◆ Par nestri cont al è clâr il dissen: svuedâ il Friûl de sô identitât e de sô rapresentance, e tornâ a rindilu margjinâl come che al è stât tantis voltis te sô storie e come che al jere fintremai ae fondazion de Regjon autonome. No si spieghe in altre maniere il cidinôr totâl su la cuistion dal referendum sul tai dal numar dai parlamentârs, che si davuelzarà ai 20 di Setembar. Sot dal ombrenon chest Istât si vares di fevelâ (invezit dut al tas) de riduzion di 630 a 400 dal numar dai deputâts e di 315 a 200 di chel dai senatôrs, cuntun sparagn di 57 milions par ogni an: leç che e à di jessi confermade parcè che e cambie la Costituzion, ma par nô furlans e cambie ancje la consistence de nestre rapresentance politiche in Parlament. O lassarìn par strade 5 deputâts (i 13 di cumò a laran a ridusisi a 8 ) e 3 senatôrs (fin cumò a son 7); il 40 par cent dai rapresentants dal teritori regjonâl al larà a sparî. Trent e Bolzan, te gnove configurazion, a pierdaran dome un senatôr. Come al solit, a difindaran la lôr comunitât miôr di nô. Ancje la Basilicade, tra lis Regjons che a pierdin plui senatôrs, e à pontât i pîts e e à fat ricors ae Cort Costituzionâl par sospindi il referendum, pe grave lesion ae rapresentance de sô int che la gnove leç e larès a introdusi. La Regjon Friûl-Vignesie Julie invezit e tas, come se vê o no vê il 40 par cent di parlamentârs di mancul e fos une robe di nissun cont. Come se a fossin purcits contents di deventâ persuts… i politics furlans si preparin a la estinzion, cence sunsûr. E i furlans no somein vê masse voie di protezi la categorie. Cuisà parcè? ❚