SCUELE. Une scuele piçule piçule

Tal ultin editoriâl di Dree Valcic, il diretôr al à vût scrit de scuele, di ce che si spiete e di ce che si spere: dispès la realtât e je mancul sperançose e pui cragnose. O savìn che e esist une leç, o savìn ancje che al è un regolament e, magari cussì no, a mancjin i fonts necessaris par dâ atuazion e dignitât a ce che al è su cjarte. O savìn ben che ancje cuant che la int si esprim, cualchidun al cîr di meti a tasê dut: la vicende di Bruno Forte che al aplicave la leç, al è pai plui ancjemò un ricuart vîf. In cheste suaze, o vin savût di un fat grâf sucedût tal Istitût Comprensîf di Tisane. Une persone dal lûc, sustade cun me, mi à dite che no sintive la libertât di podê sielzi pal insegnament dal furlan a scuele. Une mestre e cisicave, par no dî menaçave, che il frut che al varès fat furlan al varês saltât di fat 30 oris di talian intun an, scugnint dopo recuperâ, parcè che jê no varès spietât nissun: il program prin di dut, ancje prin dai fruts. No dome, ma a nivel di segretarie, cualchi impiegât al spiegave, “diligjentementri”, par cuâl motîf che al jere miôr evitâ di pierdi timp cul furlan. Fin chi, un al podarès dî: a son forsit impressions, ma purtrop no je cussì. Un sms mandât a plui di cualchi gjenitôr di une assegnade ae segretarie, al visave testualmentri cussì: “La maestra (…) invita a non iscrivere il bambino a friulano”. Un at grâf, sanzionabil de leç, ma ancjemò plui grâf se si pense a chei che in maniere plui o mancul sporcje, a doprin il lôr rodul istituzionâl par messedâ la int par fâi fâ ce che lôr no condividin. Al è un dirit podê no jessi dacuardi suntune cuistion: al è clâr che la leç sul furlan e à di jessi miorade, ma nol è onest compuartâsi cussì. La persone che mi à metût a cognossince di chei fats, no sa ce fâ. Se e sburte pal furlan, come che e volarès cun altris gjenitôrs, e à pore di jessi discriminade. La tentazion di tasê e “inlineâsi” e je fuarte. Une scuele cussì e da tant ce pensâ, ancje pal gjenar di condizionament che e impon e pal gjenar di “imprinting” che al ven dât ai fruts. I fats fin ca, parcè che par fortune o vin sintût al telefon la dirigjente locâl Chiara Zulian che in bon furlan si è slontanade dai ategjaments ripuartâts, declarant la volontât di fâ lûs su la cuistion e di fâ rispietâ la leç. No jerin peraulis di circostance: la siore Zulian mi à, intun moment, tirât fûr almancul trê tipologjiis diferentis par dopâ il furlan in clâf multidissiplinâr, cence sparagnâ di dîmi lis dificoltâts che la scuele si cjate a vivi, sclarint ben che e crodeve personalmentri al valôr di une culture che e partìs di chenti par slargjâsi sedi al mont che a chês altris materiis. No crôt che Tisane e sedi un câs isolât: dal sigûr no son dome sporcjetâts, ma il câs al fâs scrupulâ che la “fabriche de culture”, la scuele, no sedi chenti ancjemò ae altece de sô part, par vie che e samee bramâ une omologazion a plui nivei. Al fâs pensâ ancje il fat di chei furlans che a glotin e che si cjatin a domandâsi ce fâ, vint il dubi ancje su ce che al sarès just fâ. La scuele dal coraç di jessi e esist ancje a Tisane, o soi sigûr, ma viodi il dam che e pues fâ une azion di bessole al fâs pensâ, no dome sperâ. Une anime antighe di 8 agns, mi à dite une dì: cui che nol à il coraç di jessi, nol podarà mai deventâ. La pedagogjie insegnade dai fruts. O vin ancjemò tant ce cjaminâ. ■
Mauro Della Schiava