CINE & TEATRI & ART. I 20 agns di Avostanis

Federico Rossi al è la anime di Avostanis. Lu vin sintût in ocasion di cheste edizion.
In struc, cuale ise stade la evoluzion di chest che al è deventât un event che al clame int ancje di fûr?
Chel che tu tu clamis “event” par nô al è il moment uficiâl, che o condividìn cun altre int, di un percors continuatîf che o fasìn vie pal an tal laboratori dai Colonos, in tiermins di riflession, di elaborazion e di progjetazion culturâl. Sot vie e je une ativitât costante di ricercje, che o puartìn indenant cun dute une rêt di grups e di personis di culture, studiôs, artiscj, creatîfs e vie indenant.
Cuant che tu mi domandis ce evoluzion che o vin vût, mi vignarès di dî cuntun pocje di braure che o sin stâts pluitost fers, salts intal spirt origjinari, ancje par vie che o sin cuintri de ditature dal gnûf che e impere in dì di vuê.
Identitât al è un concet che voaltris o vês simpri vût clâr, ma soredut in clâf di identitât che si vierç al mont.
Cu la identitât o tocjìn il cantin di une realtât cussì complesse e ambigue, dibot misteriose, che si à di cjapâle cun grande cautele intal rapuart intrigât fra il jessi e il divignî. Al diseve Nietsche che si à di cirî di deventâ ce che si è. Pluitost di tratâle in maniere ideologjiche, nô o vin miôr vivile cun naturalece, te cussience de sô problematicitât e dal fat che te societât contemporanie, definide “licuide”, e je deventade plui fluide, plui magmatiche, cence par chel pierdi la sô impuartance primarie come sisteme di valôrs insedâts te storie di une comunitât, te sô culture e te tiere dulà che e vîf.
Puedistu dînus alc di plui sul colegament fra locâl e globâl?
La sfide pal Friûl e je chê di individuâ lis strategjiis plui eficacis par tignî vîf il patrimoni che o ai a pene dit tal telâr dal mont globalizât. O vin di fâlu cence sotanance, cu la convinzion che la realtât globâl e je deventade cussì invasive che il pericul nol è plui chel dal “localisim”, ma al contrari chel dal “globalisim”. E no stin a dismenteâ che tal nestri dna o podìn cjatâ orizonts di largjece straordenarie. O pensi par esempli che il sentiment cosmic che a coltivavin lis comunitâts contadinis, nol jere di mancul, al jere se mai plui grant de “universalitât” globâl di vuê. Cheste e podarès jessi une gnove piste di aprofondiment pai Colonos, ma no dome par nô.
Avostanis al è une ocasion indulà che la int si cjate e voaltris o vês la ocasion di scoltâle: cemût ise cressude la sensibilitât rispiet ae culture e ae lenghe furlane?
O vin la fortune di vê un public che tai fats nol è un public tal sens che si lu intint par solit, ven a stâi une masse di int anonime e passive che e ven a cjalâ un spetacul e a bati lis mans. Il popul dai Colonos al è fat di personis che a son animadis di une curiositât sincere tai confronts des nestris lidrîs, di ce che al sucêt tal mont di vuê, cirint di capî il sens dal vivi. Cjalant dal nestri osservatori mi samee che in chescj ultins 21 agns si è slargjade une vore la cussience sociâl de impuartance de identitât linguistiche e culturâl. Si cjalin chescj valôrs cun plui sensibilitât, plui convinzion e ancje cun plui rispiet di une volte.
Secont te, cuâl isal stât l’apuart di Avostanis te societât e te culture furlane?
Al è propit dificil dâti une rispueste: cheste e je une valutazion che a varessin di fâ chei altris, i furlans o ancje voaltris. Jo o pues dîti cuâl che al è stât fin cumò il nestri progjet: cirî di meti in as – intun ecuilibri che al è simpri sul ôr e lant di un continui par tentatîfs – la lenghe e la vite, la culture e il teritori, la tradizion e l’avignî, il nestri jessi specific cul jessi presints tal mont. O vin cirût di mandâ messaçs e segnâi in forme creative.
Puedistu fânus cualchi segnalazion su Avostanis 2012?
Stant che il program aromai al è public, no rivi a dâus primiziis. Une robe che mi plasarès meti in evidence, pluitost, e je la grande produzion culturâl che o puartìn indenant come associazion Colonos. Te suaze di cheste edizion di Avostanis o vin publicât il libri “Ad infera”, scrit di plui autôrs cul coordenament sientific di Gianpaolo Gri; il catalic “Stralûs” (par furlan, talian e inglês) in ocasion de mostre di mosaic dal artist di Ravenna Marco De Luca a Aquilee; e il cd spetacul “Sclopetadis”, curât di Massimo Somaglino cun Carlo Tolazzi, presentât in ocasion de serade di premiazion dal concors leterari in lenghe furlane par un romanç “In Trê Riis”. ■
MAURO DELLA SCHIAVA