CUSINE. Di Istât il gustâ si met te tace

Cuant che al rive il cjalt, dispès no si à trope voie di metisi a mangjâ ma si à dome un grum di sêt, tant di fâsi vignî i crots te panze, sfulminant litris e litris di aghe.
Cu la aghe, però, no si sostentisi e par sigûr lis bibitis industriâls, massime chês cu lis bufulis, no son une alternative masse salutâr, plenis tant che a son di colorants e di zucars.
E alore no je une idee trop sbaliade cirî alc di bevi che al puedi gjavâ la sêt ma ancje, tal stes timp, dâ al cuarp elements nutritîfs impuartants. E magari puartâ te diete dal Istât une schirie di savôrs e di colôrs gnûfs e difarents.
AYRAN,  IL JOGURT DI BEVI
E je une bevande tipiche dal Medi Orient ma popolâr ancje in Indie, dulà che e je cognossude cul non di “lassi”. In pratiche al è jogurt blanc no dolcificât, slungjât cuntun got di aghe frescje (o frulât cuntun pâr di cuadreluts di glace) e cuntune prese di sâl e, parsore, te tace, une spolvarade di mente taçade, frescje o secje. A cui che nol à mai cerçât i sunarà strani ma e je une robe une vore dissetante, frescje, che par di plui e puarte i beneficis dal jogurt, il grant aleât dal intestin.
UNE SALATE DUTE DI BEVI
Al è ancje considerât un aperitîf di mode ma al è massime une sorte di “salate te tace”, che e corispuint in pratiche a une porzion di verdure: il struc di pomidoro al è une soluzion ideâl pâr fâ une cjame di vitaminis ancje cuant che propit no si rive a parâ jù nancje une bocjade. Si cjate facilmentri tal supermarcjât ma si pues fâ ancje in cjase, cuntun normâl fruladôr e pomidoros ben madûrs. A cualchidun i plâs cussì, in purece, ma la version plui popolâr e sauride e je chê cuinçade, cun cualchi gote di struc di limon, une prese di sâl, une lagrime di salse Worcester, une di Tabasco o une presute di pevaroncin (a son tantis ricetis difarentis, e ognidun al pues cjatâsi fûr la sô) e insom une grimpade di maiaron salvadi.
Il sûc di pomidoro al pues jessi ancje un sugjeriment bon par fâ esperiments, parcè che nuie al impedìs – baste vê une piçule centrifughe domestiche – di provâ a discuvierzi trop bogns e sans che a puedin jessi i strucs des diferentis verduris e pomis, magari di provâ a miscliçâ tant che l’industriâl “sûc Ace” (cun narant, carote e limon).
AL TORNE DI MODE IL BON VECJO SAÛT
Te tradizion nostrane si pues simpri cjatâ cualchi idee che e pues semeâ gnove e origjinâl, ancje se invezit e je alc che i nestris nonos a dopravin bielzà. E un classic esempli al è il bon vecjo saût, un sirop naturâl che, cuntun got di aghe, al divente une bevande perfete cuintri la sêt, cun grandis cualitât rimineralizantis e ancje une lizere proprietât lassative. Un tic dismenteât a vantaç dai sirops industriâi plui colorâts, par fortune al sta tornant di mode (ancje cun aghe e vin, intune version di mode dal “spritz”): a scomencin a jessi tantis lis aziendis che ca in Friûl a àn tornât a produsilu e a vendilu.
Un altre grande soluzion che, tant che il saût, e lee la nestre tradizion a chê dai paîs dal nord, al è il bon vecjo struc di meluç, limpit e dorât, che al reste une des miôr alternativis aes bibitis industriâls, massime pai fruts. Un prodot che simpri plui dispès al ven fat ca in Friûl, par fâ rindi di plui la produzion di pomis, simpri mancul rimunerative pai contadins. Une sielte, duncje, che e premie ancje une sane politiche di “km 0”, massime se si sielç lis aziendis nostranis che a produsin in maniere biologjiche.
MET TAL FRIGO LA TISANE
Il te frêt in butilie al va simpri di mode. E al coste. E no si capìs parcè no pensâ di fâlu in cjase, dosant la cuantitât di zucar e di limon a plasê, e doprant une normalissime carafe che e puedi stâ in frigorifar. E, po dopo, fasìnsal di bessôi in cjase nol tocje limitâsi a chel che al ufrìs il marcjât, ma si pues provâ cu la cualitât di te preferide (chê tradizionâl, chê profumade di rinfrescjant karkadè, chê di pomulis di picecûl, plene di vitaminis e proprietâts curativis, fin ai plui difarents messedots di jerbis rilassantis, depurativis, diuretichis). Di prontâ, imbutiliâ e meti tal frigo, cun o cence zucar o limon, a plasê. ■
Margherita Timeus