SLOVENIE. Cemût fâ turisim alternatîf in Slovenie

“LIZÊR” E…_Tai ultins agns e je di mode il soft tourisim, che voltât dal inglês al sarès “turisim lizêr, plasevul”, passant lis feriis in puescj li che si rive adore a rilassâsi framieç de nature. E la Slovenie e somee un paîs fat di pueste pai turiscj cun cheste intenzion, jessint i slovens rivâts adore a mantignî inmò in dì di vuê un rispiet disìn cussì “asburgjic” viers la tiere, i flums, i lâcs e viers plantis e animâi.
“ALTERNATÎF”_ Cheste int che e cîr di passâ lis feriis in maniere alternative, fûr dal grant zîr des localitâts che si cjatin ben o mâl ripuartadis su dutis lis vuidis, e pues gjoldi de oportunitât di vivi par un ciert periodi tune cjase storiche adun cui proprietaris de abitazion, che le tegnin cont stant atents a conservâ lis struturis, la mobilie e ducj i piçui particolârs che le rindin uniche, cun chê di vuardâ la ereditât culturâl dal lûc. Tal stes timp, il dâ acet ae int che e rive di fûr e je za di timp deventade une valide ocasion par dâ lavôr ancje a cui che nol vîf tai centris turistics plui cognossûts.
TRADIZION_ Di chestis residencis storichis, 11 si cjatin adun dentri te associazion Hiše s Tradicijo (in sens leterâl al sarès “Cjasis cun Tradizion”, vâl a dî “Cjasis Tradizionâls”). Si trate di abitazions, viertis pai turiscj dut l’an, sparniçadis dal confin cu la Ongjarie al Adriatic. A son dividudis in trê categoriis, ven a stâi: cjistiei, cjasis in tignudis di campagne e costruzions rurâls. ’Nd è pardabon di ogni sorte, li che ognidun al pues sielzi stant aes sôs preferencis e esigjencis; ce che al ven sigurât de associazion al è il bon acet e il contat personâl di bande dai proprietaris, la alte cualitât dai furniments, il mangjâ e bevi san e tradizionâl, lis plusoris ocasions par polsâ, straviâsi e fâ sport.
ANTIGHIS_ Lis dôs cjasis plui antighis a àn passe 400 agns: une e je la cjase Ločnikar a Zreče dongje Maribor, su lis culinis dal Pohorje, li che si pues visitâ il lâc Črno e in plui lis termis e il centri schiistic locâl. Chê altre residence e je cjase Želinc, che si cjate su la confluence dai flums Idrijca e Cerknica dongje Cerkno, pôcs chilometris a Soreli jevât di Tolmin.
SCHI_ Se us interesse il mont dal schi, te cjase tirade sù tal 1857 a Nova vas, cualchi chilometri a Soreli jevât di Postumie, si cjatin in mostre i furniments dai prins schiadôrs slovens, cemût che al à vût contât pe prime volte l’innomenât scritôr sloven Valvasor te sô opare dal 1689 “La glorie dal ducât dal Cragn”.
MÂR_ Se invezit us plâs il mâr, ancje fûr de stagjon cjalde, e je la Cjase dal Sâl tal cûr dal Parc naturâl des salinis di Sečovlje/Sicciole, a cuatri chilometris di Piran/Pirano e a doi dal confin cu la Cravuazie. Dal secul XIX culì a vivevin i lavoradôrs che a tiravin dongje il sâl su la rive dal Adriatic; cumò al è un stâ viert ai turiscj, cuntune visuâl maraveose sul mâr.
EUROTRAD_ La socie Hiše s Tradicijo, dutun cun associazions di cjasis storichis di altris cinc paîs (Portugal, Irlande, France, Ream Unît e Olande), e fâs part dal Europe TraditionÆ Consortium, nassût par prudelâ lis residencis storichis dal Continent Vieri. Midiant il Progjet Eurotrad, finanziât de Union europeane traviers il plan Interreg IIIC, si son zontadis sociis di Spagne, Austrie, Ongjarie e Italie (la uniche associazion si cjate in Friûl, “Case della Tradizione”, cun sede tal cjistiel Savorgnan di Brazzà a Sante Margarite di Morùs). Par vê plui informazions, lait sul sît internet (par sloven e par inglês)
www.hisestradicijo.com. ■
Alessio Potocco