Sfuei Mensîl Furlan Indipendent
Archivi de Patrie

Il pont sul DDL pe lenghe furlane/2

Anna Bogaro, diretôr www.lenghe.net

TESINI (DS): “LEÇ IMPUARTANTE PE SPECIALITÂT”. BLASONI (FI): “PLUI STORIE E CULTURE”
Domenie ai 22 di lui. Ancje il President dal Consei regjonâl, Alessandro Tesini, al interven tal dibatit sul DDL pe lenghe furlane. Tesini nol cjape une posizion nete sul cont de scuele e sui altris cantins inmò in pîts.
Cun dut a chel, al rimarche che il furlan al è impuartant pe specialitât regjonâl e al sosten che il plurilenghisim
al è un valôr positîf.
Massimo Blasoni, conseîr regjonâl di Forza Italia e membri dal Comitât ristret, al segnale la necessitât di dâ plui pês tal DDL ae Universitât dal Friûl, aes associazions e al insegnament, dongje de lenghe, ancje de culture
e de storie furlane.
COMITÂT RISTRET: ÛS VEICOLÂR DOME CUL 100% DES ADESIONS
Lunis ai 23. Ancje chest viaç te riunion dal Comitât ristret si decît di rimandâ dut a lunis che al ven (ai 30), ma cun cualchi pont fer: 1) confermât l’insegnament automatic dal furlan; 2) plui pês a lis variantis locâls. In particolâr
te toponomastiche si varà di doprâ la variante e no la lenghe standard.
Al reste di decidi te prossime riunion cuale funzion dâ al Arlef, cemût risolvi la cuistion de delimitazion e cemût regolâ l’ûs veicolâr de marilenghe. L’ipotesi in discussion e je di permetilu dome se al è il consens dal 100% de classe. Chest al è in contrast cun ce che e previôt la leç 482/99.
MOLINARO (UDC): “ILLY, FÛR I BÊÇS”. SHAURLI (DS) “SÌ AE LENGHE VEICOLÂR”
Lunis ai 23. Il cjâfgrop de Udc in Regjon, Roberto Molinaro, al fâs notâ che “ta chescj agns a son mancjadis lis risorsis economichis e umanis pal insegnament de marilenghe. O misurarìn la vere volontât di Illy su la fonde dai finanziaments ae leç”.
Il segretari dai Ds de Provincie di Udin, Cristiano Shaurli, al sosten l’ûs de marilenghe tant che lenghe veicolâr e al pant fuarts dubis in riferiment ae propueste dai “Cittadini” di permeti ai Comuns za delimitâts di gjavâsi fûr de aree di tutele
AL NAS UN PARTÎT TRASVERSÂL CUINTRI IL DDL
Miercus ai 25. Ce àno in comun Uberto Fortuna Drossi (Cittadini) e Sergio Dressi (An), Cristiano Degano (Margherita) e Roberto Asquini (Fi), Bruno Zvech (Ds) e Roberto Menia (An)? A fasin part, adun cun altris coleghis, dal “partît trasversâl” che si à metût dongje in Consei regjonâl cuintri dal DDL pe lenghe furlane.
Fortuna Drossi al è contrari par principi al insegnament dal furlan. Dressi al à pôre dai coscj. Degano al è “perplès”. Par Asquini “miôr l’inglês”. Zvech al dîs che no si à di fâ “fuarçaduris”. Menia al fevele di “matetât culturâl”.
MARAN (DS) E LEONARDUZZI (RADICÂI): REFERENDUM CUINTRI IL FURLAN
Vinars ai 27. Cui che al veve pensât che aromai al jere stât dit za dut cuintri il DDL al reste malapaiât. Il deputât dai Ds, Alessandro Maran, al declare che se al ves di passâ te leç l’ûs veicolâr dal furlan inte scuele, si ativarès par clamâ dongje un referendum abrogatîf. A menaçâ il referendum al è ancje Gianfranco Lenarduzzi dai Radicâi, che adiriture al definìs l’ûs veicolâr de marilenghe “antidemocratic” e i fonts pal furlan “imorâi”.
IL COMITÂT RISTRET AL FÂS BON UN TEST CHE AL LARÀ IN CONSEI A SETEMBAR
Lunis ai 30. Il Comitât ristret de VI Comission dal Consei regjonâl al fâs bon un http://lexview-int.regione.fvg.it/iterleggi/Iter_Leggi/Serv-lc/iter_leggi/legislatura_ix/testi_comitato_ristretto/257-260-249-174_cr.pdf
test unitari dal DDL su la lenghe furlane cui vôts di Ds, Margherita, Cittadini per il Presidente e Rifondazione Comunista. Contraris Forza Italia, Alleanza nazionale, Udc e Lega Nord. Astignûts i Comunisti italiani.
Il test che al ven fûr al è miôr di chel fat bon de Zonte, ma al presente inmò passaçs dubis, tant che la facoltât dade ai comuns di gjavâsi fûr de delimitazion e i fuarts limits al ûs veicolâr de marilenghe a scuele. Massime par chestis resons Lega Nord e Comunisti italiani no àn poiât il test finâl. La bale cumò e passe al Consei, che al sarà clamât a decidi in Setembar.

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +