TV FRIÛL E CJANÇONS. Cuet e lecât

Benedetta Parodi, Gordon Ramsay, Alessandro Borghese: i gnûfs astris de television taliane no son i presentadôrs ma i cogos, e  in chescj timps che lis tassis nus mangjin sù dut, al samee che ancje noaltris no pensìni a altri che a mangjâ.
E la television furlane? Cemût rispuindie a cheste invasion di programs di cusine? Cun “Cuet e lecât”, il program che al met adun dutis lis trasmissions di cusine da la Italie, voltantlis par furlan.
I concorints si sfidin in trê provis, plui la sfide finâl, par dimostrâ di jessi cogos brâfs e soredut cogos furlans. Prime di scomençâ a cusinâ, naturalmentri, bisugne fâ la spese, e chê e je la prime prove di “Cuet e lecât”. I concorints a varan di mostrâ di savê fâ la spese  “a furlan vie”, vâl a dî sparagnant e profitant di chês robis che a rivin di rive jù, come lis jerbis di cjamp. Subit scualificât, duncje, cui che nol è bon di cognossi e cjapâ sù sclopit e urtiçons.
Cu la seconde prove, i concorints a varan di mostrâ di savê fâ un aperitîf, e soredut di calcolâ a voli, cjalant il numar dai clients, trops “un par doi” preparâ. I concorints a vadin indevant dome se cuant che un client al ordene un “spritz” a fasin un spritz normâl, cence Aperol. E samee une regule facile ma, si sa, la emozion cualchi volte e fâs falâ.
Si rive cussì al moment de prove di creativitât. I concorints – o pensarês voaltris –  a varan di inventâ alc di gnûf. Sbaliât: in Friûl a taule no si invente nuie, si reste fedêi ae tradizion. La prove di creativitât si fonde dute ator di un unic plat: il frico, che si pues fâ cu lis patatis, lis civolis, la coce, lis jerbis e scuasit dut ce che si vûl. Il frico al è unic e multipli, e al rapresente propit il mût furlan di jessi creatîfs: inventâ alc di gnûf ma cence movisi masse des regulis.
E o sin rivâts finalmentri ae ultime prove, la vere essence dal furlan che al cusine: un plat di alte cusine? Une ricete complicade? Un menù pes grandis ocasions? No, pan e salam!
I concorints a laran fûr dal stadi Friûl e in mancul timp pussibil a varan di meti sù un rinfresc pal dopo partide. Cui che al rive a tirâ dongje plui int che nol cognòs ufrint nome pan, salam e un tai di vin, al è sigûr il cogo plui furlan di ducj. ■
BETE DI SPERE