Sfuei Mensîl Furlan Indipendent
Archivi de Patrie

MUSEUS. La plêf tal cûr de Cjargne

............

statue di len di Sant Martin e il puar
statue di len di Sant Martin e il puar

Tra mieç des Alps de Cjargne e dongje de aghe dal Dean e je la plêf di Guart, poiade suntune alture che e fo frecuentade za tai prins secui dopo di Crist. La glesie e je dedicade a Sante Marie, “mari di Guart”, come che le clamin i paisans e che di simpri e je pont di riferiment par dute la comunitât dal cjanâl.
In prin si crodeve che la glesie e fos la plui antighe de valade, dal VIII secul cirche, ma sgjâfs resints li de glesie medievâl di Sant Martin, un pôc plui a val, a àn puartât in lûs un prin edifici di cult dal V secul d. d. C.; si trate di une basiliche paleocristiane, di un batisteri monumentâl e di une vasche batesimâl, i plui arcaics de Cjargne.
Cheste e je une testemoneance impuartantone che e palese l’intent de Glesie Mari di Aquilee di evangjelizâ i Carnics e ducj i popui di chenti, spostant indaûr lis origjins cristianis di chescj puescj.
La alture dut câs e riferìs ancje elements che a fasin ipotizâ une presince antropiche za in epoche preromane, un cjistielîr e po dopo une vedete militâr, zone strategjiche duncje che e menave sù fin al Noric traviers de Valcjalde e il Pas di Mont di Crôs.
Po la plêf e fo trasferide sul cuel tra i paîs di Negrons e Cele, considerât un lûc plui sigûr e dulà che forsi te antichitât al vignive sù il cjistiel di Negrons.
IL CJISTIEL_ Ancje dal cjistiel no son notiziis siguris; la tradizion e vûl che la gnove plêf e fo fate sù cu lis pieri dal cjistiel, sdrumât dal patriarcje Ludovì di Tech daspò dal sassinament di Bertrant, dulà che al partecipà ancje Ermanno di Cjargne, paron propit di chel edifici.
La plêf di S. Marie e je une basiliche a trê navadis che e custodìs diviersis oparis di art: afrescs dai secui XII-XIII, une vore di ogjets artistics e liturgjics e un archivi plebanâl cun 140 pergamenis medievâls.
IL MUSEU_ Si fevelave duncje di une frecuentazion paleocristiane, e lis provis di cheste presince antropiche nus vegnin dai reperts conservâts tal museu de plêf, logât tune stanzie tacade de glesie. Chi al è conservât il toc plui antîc, la “Lavara di Cjanaia”, frament di lapide preromane cuntune iscrizion inmò no decifrade, cun caratars nord etruscs/venetics. Il toc al fo cjatât su la vie che di Raveu e rive a Guart, passant propit sot de plêf, segn inecuivocabil de impuartance de zone di passaç in epoche preromane.
Altri manufat significatîf e je la cubie dai “Pipinacui”, dôs piçulis statuis di tof cjargnel che a fasin pensâ a une art barbariche precristiane.
GNOVE SALE_ Te ex latarie e je stade metude in vore une gnove part di museu cuntune esposizion di tiessûts, paraments, arzentarie, bronçs e statuis di len.
Interessantis a son lis voris di Jacum Linùs, stofis fatis di pueste cun finalitât liturgjiche, e inmò piviâi, stolis, telis di baldachin e il biel “tierç di vilût” ros ben conservât no cate il so mieç mileni di storie. Te arzentarie si cjatin tantis antichitâts come la crôs plevanâl gotiche, i trê relicuiaris gotics e lis clocjis (lampadis a pendacul dal secul XVII). ■
ORARIS DI VISITE – Ogni domenie e festîfs 9.30 – 11.00 – Par informazions clamâ la parochie di Sante Marie di Guart tel. 0433 60358 o la rêt CarniaMusei tel. 0433 487779. ■
VENUSIA DOMINICI

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +