TUTELE. Ducj, o cuasit, cidins sui dirits linguistics

La visite dal president de republiche Giorgio Napolitano e à marcât trop indaûr che e je inmò la nestre classe politiche a proposit di tutele dai dirits linguistics. E je stade la visite sui temis de resistence e de inovazion: a Udin pe universitât e pe vision dal film Carnia1944; a Faedis par ricuardâ Porzûs; a Dieç pe mostre dal comitât di Sant Florian; a Glemone pal aniversari dal Taramot; a Cjargnà pe visite al templi de vitimis des vueris; a Pordenon cun visite smiezade par vie de emergjence dal taramot in Emilie.
Ma in cont di dirits linguistics nissun sorestant al à olsât fâ peraule. Dome un incuintri cu lis associazions slovenis a Vençon; un apel dal president de Provincie di Udin Pietro Fontanini pe introduzion dal furlan in Rai e la buine volontât di Cristiano Shaurli, sindic PD dal Comun di Faedis, che al à consegnade une letare dal Comitât 482 al President par che si fâsi garant de Costituzion che al articul 6 e tutele lis minorancis linguistichis de Republiche.
Pal rest, ducj cidins. E intant Radio Onde Furlane si cjate a scugnî mandâ a cjase un gjornalist parcè che no rive plui a stâ dentri tes spesis, par fâ un servizi public che nissun altri al fâs, cun passe il 70% des trasmissions realizadis par furlan.
E je vere: e je la crisi. Ma no produsie economie ancje la Cooperative di Informazion Furlane che e da un stipendi a 7 di lôr, cence contâ l’indot fat di produzions musicâls, leterariis e di progjets tes scuelis?
Forsit la Republiche ise fondade su lavôrs di serie A e lavôrs di serie B? ■
Redazion