Ai 9 di Mai e cole la Fieste de Europe. La date, sielzude tal 1985 de bande dal Consei european, che al è l’orghin comunitari là che si dan adun i cjâfs di stât e di guvier dai Paîs membris de UE, e je chê dal inovâl de innomenade declarazion Schuman. Cun di fat, ai 9 di Mai dal 1950 il ministri pai afârs forescj dal Stât francês, Robert Schuman, al fasè un intervent public a Parîs là che al marcave la necessitât di fâ i sfuarçs che a coventavin par sghindâ cualsisedi pericul di une gnove vuere.
Par Schuman – e pal so colaboradôr Jean Monnet, che al è ricognossût tant che il vêr autôr de declarazion – la pâs si podeve fâle sù dome cul meti adun relazions e risorsis economichis tra i Stâts europeans, che a jerin stâts i protagoniscj principâi dai doi conflits planetaris de prime metât dal Nûfcent. Al coventave creâ lis condizions economichis, politichis e sociâls a pro dal disvilup e de democrazie e cun chest intindiment i Stâts a vevin di tacâ a meti in vore une colaborazion fuartonone tal cjamp economic cun chê di meti dongje ancje istituzions politichis comuns. Su chest cantin, Jean Monnet al veve lis ideis claris ancjemò tal 1943, intant che al faseve part dal CLN francês: za in chê volte al scriveve che pe pâs in Europe i Stâts a vevin di dâs adun intune federazion.
Tal 1951, lis peraulis di Schuman e di Monnet a deventarin, almancul in part, realtât, cu la creazion de CECA (Comunitât europeane dal cjarbon e dal açâl). In chê volte si vierzeve in concret il cantîr de costruzion de unitât de Europe.
Un cantîr che al è ancjemò in vore e là che al è inmò cetant ce fâ. Al è par chest che si fâs fieste ai 9 di Mai. ■
MARCO STOLFO
FRIÛL EUROPE. Une date simbul
Marco Stolfo
