CJARGNE. Invasion americane su lis nestris monts?

Des notiziis di stampe si lei che dentri l’an e varès di jessi trasferide de Gjermanie la 173e Brigade di Fantarie aviotraspuartade USA inte caserme Ederle e te gnove Base Dal Molin di Vicence. Conseguence: dibisugne di gnûfs spazis pal adestrament dai passe 4 mil militârs parecjadutiscj che a varessin di rivâ tra Friûl e Venit. Di fat, il Comant militâr USA pe Europe al à domandât al Guvier talian di doprâ gnûfs poligons di esercitazion, un di chescj al pâr che al sedi chel de mont Bivare che al cjape dentri i comuns di Fors Disore e Disot, Sauris, Prât, Davâr e Soclêf.
Za tai agns ‘70 e jere la intenzion di slargjâ chest “cjamp di zûc” pai militârs ma il grant moviment popolâr metût in vore le à fermade. «E je cressude la sensibilitât pal ambient di bande di ducj i citadins. Nô a Sauris o vin di simpri domandât di gjavâ dal dut il poligon – al dîs intune trasmission radio il sindic Stefano Lucchini –, soredut in cheste zone classificade tant che Sît di Interès Comunitari de Union Europeane pe ricjece uniche di flore e di faune. A vuê, ni jo ni chei altris comuns interessât o vin ricevût nuie di uficiâl.»
«Nô – e conte Ira Conti dal comitât interregjonâl “PerAltreStrade Dolomiti” – o vin savût de gnove di un articul sul Gazetin di Avost dal an passât. O speravin che al saltàs fûr alc di plui, che i politics e i aministradôrs si fasessin sintî. Passât cualchi mês, o vin cjapât contat cuntun gjornalist di un cuotidian locâl che al à dât une vore di spazi ae vicende. Chest al à puartât ancje une reazion contrariade des istituzions, e nuie altri. Ma parcè, nô sempliçs citadins, vino simpri di jessi cjaçadôrs di informazions? Il comitât PAS al à cjapât contat cui elements dal ex comitât ‘Via le bombe’ di Davian e cul ‘No Dal Molin’ di Vicence. A pene che o varìn cualchi element in plui si movarìn sul teritori cun assembleis popolârs. Cheste vicende nus insegne une robe: lis emergjencis segnaladis dai diviers comitâts talians no rivuardin dome i teritoris interessâts, ma a son dutis peadis di un fîl invisibil di interès platâts che a lein a strent politiche, lobbies dal ciment, sisteme bancjari finanziari, struture e industrie militâr. A somein robis lontanis di nô, int di mont; ancje chei falcons, che a svolin adalt e lontans intal cîl, ogni tant cun sveltece si sbassin a cjace di mangjative: a stan rivant ancje achì e a son in buine compagnie.»
Une difarence di sostance: i falcons lu fasin par vivi, chei ‘falcons umans’ lu fasin par interès, freantsi de int e dal teritori. Ma i ‘indians’ dal teritori no duarmin: a son atents e pronts a no dâle vinte! ■
Marta Vezzi