TRASPUARTS. Lis dificoltâts des infrastruturis a varessin di fâ rifleti

Al è dibant fevelâ di grandis infrastruturis strategjichis, di alte capacitât e velocitât. Di trens che a taiaran la Basse tant che saetis, tal lôr viaç viers la Ucraine. Di grande plateforme logjistiche sul mâr. Di intersezion cul as feroviari Baltic – Adriatic. Al è inutil pensâ in grant, a une regjon come il Friûl-VJ che e vûl jessi crosere intun sisteme di traspuart globâl, par dopo scuvierzi che no, no je ancjemò in stât di davuelzi i problemons che si cjatin tal so piçul. Sì, problemons tal traspuart public locâl su ferade. Un deliri pai pendolârs di cheste tiere che ogni buinore si svein adore par lâ sul puest di vore. Preant rosari, tant dal viaç, par che il mieç al rivi in stazion. Parcè che e je come une lotarie. Secont i dâts, il numar di trens parzialmentri o totalmentri scancelâts dai tabelons oraris in regjon, tal 2011, al è stât di 1.552. E tai prins doi mês dal 2012, al è bielzà di 537, pratichementri za un tierç dai trens fats fûr l’an prime. E baste cjapâ il tren a Mestre, l’hub feroviari dal Nordest, par tornâ a Udin par tocjâ cun man in ce cundizions chi o sin ridots. Trens che a samein cjars par bestiis. Tai oraris di ponte, soredut. Viaç in pîts, in compartiments soçs, cragnôs. E cui che al à lis valîs nol sa di ce bande parâsi: al impedìs il passaç e nol à un puest dulà lassâlis. Di provâ, par rindisi cont. La situazion e miore dome daspò Trevîs.
RICCARDI VS TRENITALIA_ Cussì, l’assessôr regjonâl aes infrastruturis e traspuarts Riccardo Riccardi al à presentât il cont a Trenitalia, daspò che l’an prime i veve afidât chel traspuart public su ferade di competence. Servizi no garantît? Multe di paiâ. Un milion di euros, la copete che ur à mandât jù a Rome, par vie di ducj chei trens “sparîts” dai display.
I pendolârs in Friûl-VJ si son metûts dongje in trê comitâts, coordenantsi. Sui blogs a denunziin ogni dì i disservizis di Trenitalia. A Riccardi i domandin che ur sedi ricognossût un bonus – scont, doprant lis penâls che la regjon e incassarà, come che al è za sucedût in altris regjons di Italie. E la partide si sposte cumò sul gnûf afidament dal servizi (il contrat al è in scjadince). Si fasarà la gare-bant di nivel european. Ma isal pardabon cualchidun che al compet cun Trenitalia? O sino aes solitis dal monopoli statâl?
Lis gnovis a rivin sul rinovament dal parc trens. Dai Paîs Bascs a ‘nd rivaran vot, gnûfs di pache. «O vin mantignude la promesse ai utents – al à fat savê l’assessôr –. Daspò la consegne a metât di Dicembar, a jentraran in servizi dentri de fin di Zenâr dal 2013».
RIUNION DE COMISSION UE_ Su pe Tav, invezit, a Triest, si è davuelte la visite de Comission Traspuarts dal Parlament european cul so president Brian Simpson. L’incuintri, daûr Riccardi, al à confermât la necessitât di lâ indevant cui progjets, intune logjiche europeane di colaborazion internazionâl. «E o vin domandât – al à dite l’assessôr – che al sedi un plui grant coinvolziment des regjons, par vie che a son dongje dai teritoris e a puedin limitâ lis azions di contrast che o vin viodût par esempli in Piemont». Ancje il comitât “No tav” de Basse al à fat sintî la sô vôs cuntune manifestazion a Udin, ae fin di Març, cuintri dai lavôrs in Val Susa e la inutilitât de opare. I nestris contestadôrs a denunziin che il cost di passe siet miliarts di euros pe trate Vignesie – Triest al sedi masse alt. «E viodût che i lavôrs a duraran 20 agns – a àn zontât –, la spese e sarà destinade a dopleâ. Cence contâ la domande di traspuart di personis e marcjanziis: sbassade, colade tra il 2000 e il 2009, dal 31%». ■
Oscar Puntel