ATUALITÂT – La Rai e ponte sul furlan… baste che a pain chei altris

Cu la gnove convenzion firmade tra Regjon e Rai dal Friûl Vignesie Julie e je tornade a tacâ la programazion par furlan su RadioUno. Dopo scuasit 3 mês di replichis e un moment di cidinôr, dai 29 di Dicembar al è tornât in onde, slargjât, l’apontament cun “Vuê o fevelin di …”: dôs strissis cuotidianis di aprofondiment su temis di atualitât dal lunis al vinars.
La gnove programazion – che e conferme che semestrâl inviade tal 2008, ai 14 di Avrîl – e scomence il 2009, in fuarce di un gnûf impegn finanziari de Regjon par 280mil euros.
Presentât prime di Nadâl te sede de Rai di Triest dal assessôr regjonâl ae Culture Roberto Molinaro, e dal diretôr de sede Roberto Collini, il gnûf progjet al puarte indevant il lavôr che al jere stât scomençât in gracie de convenzion sotscrite ai 20 di Març dal 2008 a Rome jenfri Regjon e Rai.
Di fat, la gnove convenzion e finirà in concomitance cu la scjadince naturâl de convenzion gjenerâl tra la Rai e la Presidence dal Consei dai ministris, che za e regole la programazion in lenghe slovene. In chê volte, si podarà fevelâ di une stabilizazion dal furlan tal palinsest radio, e, magari, ancje televisîf, che cumò e somee lontane.
Le prime fase di sperimentazion, finanziade de Regjon par 120mil euros, si è sierade ai 2 di Otubar. Positîfs i dâts di scolte: 280 mil scoltadôrs di medie ogni dì – al à marcât Roberto Collini, diretôr de sede Rai regjonâl, presentant la gnove programazion – cuntun share regjonâl dal 18,6% cuintri de medie taliane dal 9%.
Ve alore la gnove formule: il prin spazi, di 5 si slargje a 10 minûts, inserît te ore di plui largje scolte – ven a stâi des 12.20 aes 12.30, prime dal gjornâl radio –, al sarà dedicât al coment sui fats di atualitât; tal dopodimisdì, invezit, des 15.15 aes 15.30, si fasarà un aprofondiment dai events culturâi plui impuartants in Friûl e in regjon. Tes trasmissions, il condutôr in studi al fevelarà cun ospits.
Il sprolungjament su base anuâl de programazion radiofoniche in marilenghe, tes peraulis di Collini, al à di jessi considerât tant che “un segn di maturazion de societât regjonâl, un esempli di convivence”.
Sonia Sicco