LA FABRICHE DAI… LIBRIS. Celso Cescutti (Argeo), Primevere, Codroip, 1911

“Il vert dai àrbui, tènar, al traspâr: / come un velût si tenz plui scûr, plui clâr, / La lûs ca e là s’indore su lis fuèis / fra i àrbui ‘l è un incjant di maravèis / e sôre chest biel vert spiche sul rest / il cîl, l’imensitât di un biel celest. / Dut ‘l è tranquil, no je ombre di nûl, / squindût tes frascjis cjante il rusignûl.”
Dal sigûr no son tancj i furlans che a cognossin chest poete e cheste poesie che e à benzà cent agns. E pûr Cescutti (Flaiban 1877-1966) al è un dai sîs poetis furlans che Pasolini al sielzè pe sô antologjie de poesie dialetâl dal Nûfcent, che al curà parie cun Mario Dell’Arco intal 1952 (chei altris a son Carletti, Naldini, De Gironcoli, la Cantarutti e Pasolini stes).
Per dî il vêr no lu trate masse ben PPP: lu viôt tant che un inleterât, scuasi analfabet. Ma cheste e devente jê ancje la sô miôr cualitât, chê che i permet moments di clarece verbâl sbalsamante. Poete, duncje di istint, inmediât, sclet, indotât di une fuarce espressive elementâr. Intune situazion de poesie furlane dulà che ancjemò al paronave il spirt di Pieri Çorut e dai siei “dissepui”, e jere za une biele inovazion.
E salacor Pasolini al è ancje masse sevêr in cont de pocje culture di Argeo. Chê che o vin citade in viertidure e je une perfete otave di endecasilabis troncs (valadì cul acent su la ultime), cun rimis bussadis, dulà che la forme stilistiche e zonte a la rapresentazion scuasi magjiche di un moment dal vivi de nature. ■
Laurin Zuan Nardin