ATUALITÂT – Agnul, un grant om di culture

Magari cussì, no a son bielzà passâts plui di cuatri agns che Agnul Di Spere nus à lassâts. Par memoreâ il poete, il scritôr, il tradutôr, il ricercjadôr seri e scrupulôs, in sumis l’om di culture che i tignive cetant ae marilenghe e al so Friûl, il Comun di Sedean, l’Istitût Ladin Furlan Pre Checo Placerean, la Union Scritôrs Furlans e la Agjenzie regjonâl pe Lenghe Furlane a àn inmaneât une cunvigne che e à vût juste par titul “Memoreant Agnul Di Spere”, che si è davuelte sabide ai 10 di Zenâr li de sale consiliâr dal municipi di Sedean.
Renzo Balzan, president de Union Scritôrs Furlans, al à ricuardât che tal 1982 Agnul al fo un dai fondadôrs de socie, tant che a ‘ndi è stât il president par uns vincj agns. Di Spere, al à ricuardât Balzan, al scrivè suntun grum di sfueis furlans (ancje su La Patrie), e al fo di chei che a puartarin indevant il progjet “Centri Friûl Lenghe 2000”.
“Al capì la dimension europeane dal popul furlan, che al à di vierzisi a chei altris popui se al vûl salvâ la sô identitât”, al à vût dit Lorenzo Zanon, gnûf president de ARLeF.
Di bande sô, William Cisilino, president dal Istitût Ladin Furlan Pre Checo Placerean, al à fevelât dai leams di Agnul Di Spere cun studiôs e inteletuâi dai popui minoritaris a nivel european, come ocitans, bretons, galês, catalans.
Te sale dal municipi di Sedean al à cjapât la peraule ancje il sociolinguist svuizar Jean-Jacques Furer, che al cognossè Agnul uns trente agns indaûr e che cun lui al colaborà pe tutele des lenghis ladinis.
Alessio Potocco