Fotografiis cun Pape Wojtyla e cun Eduard Shevardnadze, e po ancje cul president dal Messic Salinas o cun grancj personaçs dal spetacul come Alberto Sordi: jentrâ intal studi di Gianni Bravo al è un pôc tornâ indaûr tal timp, a di un moment dulà che il so “brand” Made in Friuli al viazave ator pal mont cun grancj risultâts di imagjin, ma ancje cuntun grum di oportunitâts di vuadagn pes impresis di chenti. A somein secui, ma «non son passâts nancje 30 agns di cuant che il New York Times al puartave in prime pagjine un articulon che al contave de nestre spedizion te capitâl economiche mondiâl spiegant ai siei milions di letôrs che la nestre bandiere che ducj a vevin viodût di fûr dal Plaza insiemit cun chê americane no jere chê di un gnûf Stât dal Onu, ma che di une des regjons plui bielis d’Italie». Al jere il nestri sium chel di puartâ la Patrie ator pal mont no dome pai nestri emigrants, ma par fâle cognossi a ducj: parcè che cui che al cognòs i furlans si fide di lôr e par chest al è facil che al compri i nestris prodots.
FALÂT DELOCALIZÂ_ Chei di Bravo no son ricuarts e vonde; par lui e je cheste la strade che si varès di cjapâ par sburtâ la nestre economie in chest moment di crisi no dome taliane, ma internazionâl. «Noaltris o sin simpri lâts ator pal mont, prin come emigrants e po come imprenditôrs. Ma fin tai agns Otante o sin lâts dome a vendi, e po o vin scomençât a spostâ lis produzions inaltrò par sparagnâ sui coscj. Nuie di plui falât. Cui che al delocalize al è un oportunist, no un vêr impresari: e cul menâ fûr di chenti lavôr e produzion al cope il Friûl». L’imprenditôr plui fuart in Friûl, «la Danieli, e je un esempli model parcè che cheste aziende e lavore sì pe plui part tal forest, ma e ten achì lis inteligjencis e la strategjie. No licenzie in Friûl par vierzi in Russie.
E vierç in Russie par consolidâ la sô cjase mari».
PEÂSI CUL FOREST CENCE PIERDI LA LIDRÎS_ Al è chest che ur mancje cumò ai imprenditôrs furlans secont Bravo: la capacitât di peâsi a realtâts tal forest buinis di fâ cressi lis possibilitâts di espandi i lôr marcjâts. «La modalitât plui juste par cressi, se lis impresis furlanis no àn voie di agregâsi in blocs plui pençs e plui bogns di imponisi sul marcjât, e je che de joint venture con realtâts forestis: ma fin cumò la medie des aziendis furlanis no à nancje considerât la oportunitât di doprâ chest imprest di cressite».
A mancjin lis ocasions di meti in contat i operatôrs di chenti cun chei dal forest, la domande, la ufierte e i servizis (des bancjis aes assicurazions, ae logjistiche dai traspuarts) che a coventin a realizâ acuardis che a durin tal timp.
«O vìn di tornâ protagoniscj parcè che i furlans a son bogns di fâ maraveis: mal à ricognossût ancje Mohamed Al Fayed cuant che i ai spiegât che il vêr svilup de lûs eletriche nol è vignût di Edison ma di Malignani, e che chest om invezit di creâ une “corporation” cui bêçs vuadagnâts al à fondade la Bancje dal Friûl che e à disvilupât dut il nestri teritori. Chest spirt, come chel che nus à sburtât a tornâ a fâ su il Friûl daspò dal taramot, al larès recuperât dai nestris impresaris».
LIS CLÂFS DAL SUCÈS_ Che cumò, dut câs, a cjalin a resisti ae buere de crisi. E lis peraulis di ordin a puedin sei dome trê, dutis che a scomencin cul “i”: “inovazion, internazionalizazion e identitât”. La prime e varès di vê un sburt impuartanton de Universitât, «che e je une concuiste une vore preziose ma e va doprade cuntun sproc pragmatic e leât aes impresis dal teritori». Al secont obietîf si podarès rivâ «cuntun fuart investiment par creâ un puint jenfri dai produtôrs e dai “buyers” dai marcjâts plui vivarôs che vuê a son ator pal mont. Ma i nestris prodots si vendin dome se e je clare la lor divignince furlane, la lôr identitât che e devente cualitât». Un esempli? «Mi impensi – al siere Bravo – di cuant che o ai puartât pe prime volte “Latterie Friulane” a Moscje: intune capitâl come chê russe che e à 14 milions di abitants a son dutis lis marcjis di yogurt dal mont, ma “Latterie Furlane” e fature un milion e mieç di euros. E chest al mostre che intun mont che si globalize, dut al devente plat; e dome cui che al marche une fuarte difarence, une sane peculiaritât, al è considerât dal consumadôr unic e iripetibil». ■
Walter Tomada
