SLOVENIE. La seconde citât de Slovenie

Maribor, che par todesc si dîs Marburg an der Drau (si zonte il non dal flum – la Drau, Drava par sloven- che i passe dongje par no scambiâle cuntune altre Marburg, logade in Gjermanie a nord di Francfurt) e par talian antîc Marburgo (di fat cumò si dopre dome la version slovene dal non), e je la seconde citât dal paîs dopo Lubiane par cont de popolazion cui siei 95 mil abitants. Si cjate te regjon de Štajerska (Basse Stirie) te zone nord-orientâl de Slovenie, a 274 metris sul nivel dal mâr. Maribor e fo citade suntun document pe prime volte tal 1164 tant che Marchburg, vâl a dî “citât de contee”.
Sede di une universitât fondade tal 1976, il cjâflûc de Štajerska al è ancje un impuartant centri sportîf: la scuadre di balon de citât e je stade campion nazionâl par 9 voltis, in plui su lis monts daûr di Maribor (Pohorje) si tegnin ogni an provis de Cope dal Mont di schi, tant che al inizi dal 2013 si davuelzarà culì la edizion numar 26 des Universiadis invernâls.
Par rivâ a Maribor la maniere plui svelte e je chê di cjapâ la autostrade che e taie la Slovenie par traviers dal mâr al confin cu la Ongjarie; par esempli, di Pordenon a coventin 320 km, di Udin uns 300, di Gurize 240. ■
ALESSIO POTOCCO