FRIÛL EUROPE. A coventin plui Europe, plui unitât e plui diversitât

A SON TIMPS DI CRISI: ECONOMICHE, FINANZIARIE, POLITICHE E SOCIÂL. Chest al vâl un pôc dapardut, ma soredut in Europe. La situazion e je stade une ocasion buine, par tancj di lôr, par fâi cuintri ae Europe, al procès di integrazion europeane e aes istituzions continentâls. Chestis critichis a àn te smire in particolâr l’euro, che in teorie al è une monede fuarte, ma in pratiche al debil par vie che no à daûr une politiche unitarie, in particolâr in cjamp fiscâl e monetari.
A son critichis justis, dut câs chê di saltâ fûr de monede uniche, di tornâ a chês statâls di prime, e magari di tornâ a viodi (o a disfâ) i diviers Tratâts e duncje la stesse Union europeane e je une soluzion falade. La crisi no je tant chê de Europe che e je (o des “Europis” che a son: chê dal euro, chê di Schengen…), ma de Europe che e mancje. Il probleme al simpri chel: la Union Europeane e je fate sù dai Stâts, che di une bande a scuegnin passâ competencis e cuotis di sovranitât a chê e ancje ai nivei substatâi di guvier, ma di chê altre, par vie de lôr impostazion “ontologjiche”, no rivin a fâlu ad in plen.
E cussì si cjatisi ancjemò a mieze strade tal cjamp fiscâl e monetari cu lis busis che o vin za menzonât e in chel de economie, cun dut dal “marcjât unic”. E si è ancjemò plui indaûr sul plan politic, stant che i citadins e i lôr rapresentants tal Parlament european a partecipin masse pôc ae produzion di decisions operativis e di imprescj normatîfs e la UE e à une ande simpri plui “intergovernative” e simpri mancul “comunitarie”. Cul risultât che lis sieltis strategjichis o a vegnin fatis (o no fatis) tra vêts e tratativis cence fin o a vegnin cjapadis sù in maniere tecnocratiche: in ducj doi i câs cence la sovranitât e la democrazie che a coventin.
La atenzion palesade a nivel european viers de tutele des minorancis, che tai ultins agns e je lade al mancul, e je un spieli di dut chest. A coventin plui Europe, plui unitât e plui diversitât. ■
MARCO STOLFO