CJARGNE VIVE. La sartore “Pront e vie” a Darte

Al scomence di chest numar un cjanton che al fevele de Cjargne che e vîf e che e scombat
«Al è di cuant che o vevi cinc agns che o soi cu la gusiele in man», e conte la zovine sartore Barbara Silverio che cui prins di Mai e à viert il so negozi. «Dopo lis mediis o ai sielzût di lâ al I.P.S.I.A. di Glemone, e dopo o ai cjapade une specializazion di modeliste a Padue. O ai fat 18 mês di stage intun atelièr a Udin. Po o ai sielzude une strade diferente: o ai metude sù famee, cence trascurâ la mê passion. A cjase mê o vevi il gno laboratori e o fasevi cualchi lavorut par me e par chei di cjase. Ma il gno obietîf al jere chel di vierzi alc di bessole. La ocasion le ai cjapade dopo vê fat trê mês intun centri comerciâl indulà che e jere une buteghe di riparazion, e li o ai viodût che la int e à tante bisugne. O ai pensât di vierzi il negozi intun puest indulà che nol è il servizi: no pensavi di vê tante int che cun di plui e fâs il passe peraule; e je, par me, une grande sodisfazion. Di pôc o ai ancje un pocje di marçarie (fîi, cernieris, nastris e v.i.); intes primis dôs setemanis di lavôr o ai vût trê richiestis di fâ vistîts (doi par lâ a un matrimoni e un par lâ in viaç). O fâs ancje la blancjarie di cjase (sfodris pai plumins, intimelis e v.i.), o pues produsi ricams a man o ancje a machine. Si trate no dome di fâ i vistîts, ma mi tocje jessi ancje un tic psicolighe: tu scuegnis cirî di capî ce gjenar di persone che tu âs devant di te; la persone che e ven e à di jessi sigure di ce che e vûl e colaborative cun me.»
E conte Barbara, che nol è par nuie sempliç vierzi une ativitât in Cjargne cui timps che a corin: «La Regjon no ti passe nuie e nancje i comerciants. Prime tu âs di spindi ducj i bêçs e dopo forsit ti dan alc. Jo o dîs simpri che un che al à mistîr al è dibant che al ledi a lavorâ in fabriche: che al provi a vierzi une ativitât, soredut se zovin, parcè che lis fabrichis a son par chei che no àn un mistîr. O ai za vût l’onôr di vê la finance – e conte ridint -: a son vignûts e no mi àn fat tirâ fûr nuie par vie che i vevi a pene començât e par fortune no àn cjatât nuie di contestâ, anzit a son stâts disponibii e ancje lôr mi an gjavât cualchi dubi. Jo o soi plui che sodisfate dal gno lavôr: la sere o soi madure ma nol impuarte. Il segret? Un consulent che ti stedi daûr, il supuart da famee e tante buine volontât.» ■
Marta Vezzi