Sfuei Mensîl Furlan Indipendent
Archivi de Patrie

CULTURE – ART-Â. La muse zentîl de Patrie

............

Fin ae metât dal Cinccent, ancje in Friûl, lis feminis no vevin rivât a vignî fûr tal cjamp de art, risiervât ai mascjos. A vignivin tignudis par ogjets di rapresentâ. Nie di plui. A deventin, però, finalmentri protagonistis cun Irene di Spilimberc (1538/1559), la plui innomenade pitore furlane. Il nono Zuan Pauli da Ponte al jere amì di Tiziano, che i fasè il ritrat e che, al pâr, al sedi stât mestri de fantacine. Tal sofit dal salon di bal dal palaç dai marchês Mangilli, in place Garibaldi a Udin, al è un fresc di Domeni Fabris che le piture intant che e fâs il ritrat a Tiziano. E ancje il grant pitôr venezian i fasè un ritrat (la opare e je ae National Gallery of Art di Washington). Irene e copià cuadris di Tiziano e ae piture e metè dongje poesie e musiche, tant che la sûr Emilia. Par savêndi di plui, no stait a pierdisi la mostre itinerante “La muse zentîl de Patrie”, part dal omonim progjet ideât e coordenât di Sandri Di Suald pal assessorât ae Culture de Provincie di Udin e che al à puartât ancje ae publicazion di un catalic trilengâl e ae creazion di un marc.
L’intent dal progjet? Chel di fâ lûs su la part che a àn vût lis feminis artistis de Patrie, profitant de ricorence dai 500 agns dal riviel popolâr furlan de Joibe Grasse par fevelâ di Lucina Savorgnane, che e à ispirât la novele “Giulietta” scrite dal so inamorât Luigi Da Porto, ae fonde dal “Romeo&Juliet” di William Shakespeare. La storie di Lucina e Luigi e je dome il rimpin par fevelâ di cetantis altris robis: vicendis storichis, cronachis di Udin, topografie de citât, musiche e bal, e, juste apont, des artistis dai secui stâts, un cantin pardabon pôc cognossût. Cui aial sintût fevelâ, par esempli, di Felicita Sartori? Di massarie a preseade ritratiste e dame di cort te Dresde di Augusto II di Sassonie, daspò jessisi maridade cuntun dai siei conseîrs. Felicita (1715/1760) e jere gnece dal pitôr e scultôr gurizan Antonio Dall’Agata, amì di Rosalba Carriera, innomenade ritratiste veneziane, che e tignì in cjase la zovine, tacant dal 1728, tant che arleve preferide e, almancul sul imprin, tant che inserviente. De Carriera e fo arleve ancje Mariane Carlevarijs (1703/post 1750), fie di Luche, il famôs pitôr di viodudis udinês. E ve un ciert sucès a nivel udinês, ancje se e jere une artiste mediocre, Ipolite Venier (doc. 1737/1774), fie dal plui cognossût Zuan Pieri, che al judà a piturâ i frescs dal sofit dal presbiteri de glesie de Sante Trinitât a Mortean. In corispondence cun Antoni Canova e fo Marianna Pascoli (1790/1846), fie di un cjargnel che al jere lât a stâ a Monfalcon, pitore come la sûr Luigia (1805/1882).
Par cognossi altris feminis ativis tal cjamp de art – cemût dismenteâ, par esempli, ae fin dal Votcent, Cora Slocomb di Brazzà, che e fondà scuelis di pontine a fusei a Breçà e a Feagne? –, lait a viodi la mostre (a Tumieç tal mês di Novembar), che il so ideatôr e definìs une sorte di “Biblia pauperum moderne”. Tescj sempliçs e lizêrs a zuin cu lis emozions ancje in gracie di une impostazion grafiche inmagante (che si gjolt ad implen tal catalic) e di une sielte iconografiche rafinade e di grande fuarce comunicative. Dait un cuc aes imagjinis ineditis des cantinelis. Pardabon bielis.
ERIKA ADAMI

L'EDITORIAL / Preâ par furlan al è onôr e no pecjât

Walter Tomada
Jo no jeri ancjemò nassût cuant che pre Checo Placerean al tacave a voltâ il Messâl par furlan. A son passâts passe 50 agns e i furlans no àn ancjemò plen dirit, pe Glesie di Rome, a preâ inte lôr lenghe. La Conference Episcopâl dai Talians e à mancjât, ancjemò une volte, di fâ bon […] lei di plui +

Gnovis / Acuile sportive furlane

Redazion
Joibe di sere aes 6 intal Salon dal Popul dal Palaç da Comun di Udin si tignarà la cerimonie di consegne de prime edizion dal premi ACUILE SPORTIVE FURLANE, un gnûf ricognossiment che al met dongje il valôr dai risultâts sportîfs ae cussience identitarie che i campions furlans di ogni sport a son bogns di […] lei di plui +